Traballo toma as rendas da negociación para acelerar a redución da xornada
Traballo toma as rendas da negociación para acelerar a redución da xornada
O secretario de Estado de Emprego explicou que a negociación bipartita entre patronal e sindicatos non ten máis percorrido, polo que será o ministerio que se reúna cos axentes sociais
Levarase unha proposta de texto para a próxima reunión do luns 24
![Imaxe de arquivo de Yolanda Díaz, ministra de Traballo (EFE/Chema Moya)](https://img-g24-crtvg.flumotion.com/prog24/2024/20240110/Yolanda-diaz-EFEChemaMoya-100124.jpg)
O Ministerio de Traballo liderará a partir de agora a negociación con patronal e sindicatos para tentar pechar canto antes un acordo que permita comezar a reducir a xornada laboral máxima co horizonte das 37,5 horas semanais en 2025.
En conferencia de prensa tras a mesa de diálogo social mantida este luns, o secretario de Estado de Emprego, Joaquín Pérez Rey, explicou que a negociación bipartita entre patronal e sindicatos non ten máis percorrido e que será o Ministerio de Traballo o que reúna cada semana aos axentes sociais.
Aínda que Pérez Rey evitou fixar prazos, sinalou que queren remitir "canto antes" ao Parlamento un texto que recolla a redución de xornada, a 38,5 horas este ano e 37,5 horas o próximo, e que en ningún caso será a cambio de horas extras.
Pérez Rey trasladou aos medios que os axentes sociais trasladáronlle a falta de avances significativos nunha negociación bipartita que iniciaron a principio deste ano.
"Non hai mais percorrido en negociación bilateral (...) agora é esta mesa a que ten que continuar para pechar un texto que levar ao Parlamento", engadiu.
Traballo convocará aos axentes sociais todas as semanas e levará á próxima reunión do luns 24 unha proposta de texto para concretar unha medida recollida no acordo de Goberno PSOE-Sumar e da que a vicepresidenta segunda, Yolanda Díaz, fixo pechada defensa.
Pérez Rey incidiu en que é a mesa de negociación máis importante da Lexislatura e que, xunto á redución desde as 40 horas semanais vixentes, mellorarase o rexistro horario.
E aínda que non quixo fixar prazo, si que expresou o seu desexo de que se puidese pechar e enviar un texto ás Cortes antes das vacacións estivais.
Tamén deixou claro que desde o Goberno non se vai permitir "intercambiar xornada ordinaria por xornada extraordinaria".
"Non vemos con bos ollos a redución de xornada a cambio de horas extras", insistiu.
Sobre a posibilidade de pechar ou non un pacto coa patronal sobre este tema, incidiu en que se "vai facer todo o posible para incorporar a todos os actores" pero que, se non fose posible, non se vai renunciar "baixo ningún concepto" a un dos elementos característicos deste Goberno de coalición.