Pasa a disposición xudicial o acusado de provocar un incendio nunha casa da Pobra do Caramiñal

Trasladado desde as dependencias da Garda Civil, minutos antes das once da mañá chegaba aos xulgados de Ribeira o único detido como presunto autor do incendio rexistrado no inmoble da Mirandela. 

Canda os trámites do xulgado, a Garda Civil segue coas pescudas dun caso que se trata como violencia de xénero.

O delegado do Goberno en Galicia, José Manuel Miñones só dixo que "no momento do suceso sempre está a investigación e ata que non teñamos pechada a investigación non damos ningunha información".

De momento, o que transcendeu desa investigación apunta a que o incendio foi provocado.

Os bombeiros encontraron no baixo material incendiario e ata nove bombonas de butano en diferentes estancias. Cando chegaron, o detido estaba fóra e a súa dona, con problemas de mobilidade, na cama. 

Avisounos a propietaria do inmoble, que vive no piso de arriba e que lles dixo aos axentes que non era a primeira vez que tiña problemas co detido, un home de 68 anos.

Con todo, á Policía Local da Pobra non lle consta ningún expediente ao respecto. Si saben que Asuntos Sociais do Concello estaba a realizar un seguimento do caso da parella.