Tres hospitais galegos e científicos da USC colaboran nun ensaio clínico para tratar a vertixe persistente

Un 50 % da poboación vai ter nalgún momento da súa vida un problema de vertixe. A máis persistente orixínase no oído interno polo desprendemento dunhas boliñas de calcio e provoca mareos, caídas e vómitos. Un ensaio clínico de científicos galegos, no que participan físicos e matemáticos da USC, abre agora novas posibilidades de tratamento.

O ensaio clínico que está dando resultados prometedores, especialmente en doentes que non responden ben ao tratamento convencional. 

"Hai unha porcentaxe de doentes, un 10 %, nos que esas manobras non son efectivas, probablemente porque non as facemos coa precisión suficiente para adaptalas á anatomía do oído da persoa", afirma Andrés Soto, o xefe do Servizo de Otorrinolaringoloxía do CHUS. 

Porque hai anatomías máis particulares. Desde o punto de vista dun físico, o problema vese como xeometría e dinámica de fluídos. Cando as canles que temos no oído son menos convencionais, a secuencia de manobras para sacar dos condutos do oído as boliñas de calcio que provocan a vertixe ten que partir dunha medición máis exacta.

 "Porque a súa xeometría é diferente do normal. En vez de estar esas tres canles nas tres dimensións do espazo, teñen unha xeometría diferente. Entón resolvemos ecuacións físicas que describen como é o movemento das boliñas dentro deses fluídos que están aí dentro", explica Alberto Pérez Muñuzuri, físico e investigador da USC.
 

 "Nós facémoslle unha resonancia magnética ao paciente para ver como é o seu oído. Os físicos fan unha simulación matemática para calcular o que son os ángulos da posición deses condutos do oído e nós na cadeira, que nos permite unha precisión moi grande nos movementos da cabeza, facemos a manobra", engadiu Andrés Soto, o xefe do Servizo de Otorrinolaringoloxía do CHUS.

Unhas manobras que levan detrás millóns de ecuacións: cálculos algorítmicos individualizados para cada paciente que usan intelixencia artificial e que están conseguindo taxas de rehabilitación da vertixe próximas ao cen por cento.