Catro policías hospitalizados e dez detidos pola violencia alentada pola extrema dereita en Inglaterra

O incremento da axitación entre os círculos da ultradereita no Reino Unido xa é a primeira crise importante para o novo Goberno laborista de Keir Starmer, tan só un mes despois da súa clara vitoria electoral.

Catro policías permanecen no hospital e dez persoas foron detidas tras os disturbios rexistrados este venres no centro de Sunderland, no nordés de Inglaterra, onde un grupo de alborotadores de extrema dereita incendiaron un vehículo e un edificio.

Os incidentes producíronse durante unha protesta polo asasinato de tres nenas nun centro recreativo de verán o pasado luns na localidade de Southport, noroeste inglés, onde un adolescente de 17 anos acoitelou a varios menores e dous adultos.

A desinformación difundida por Internet sobre o acusado do ataque prendeu con rapidez a mecha entre os grupos radicais que aproveitaron a traxedia para darlle pábulo a narrativas supremacistas e o discurso do odio contra os migrantes.

A superintendente xefa da policía de Northumbria, no nordés inglés, Helena Barron, dixo nun comunicado que as forzas da orde "confirman que tres axentes foron trasladados ao hospital para recibir tratamento polas súas feridas.

Un xa foi dado de alta e os outros dous permanecen hospitalizados para recibir tratamento". "Calquera persoa implicada nos disturbios que vimos pode esperar ser tratada con firmeza, e esa acción xa comezou. Ata o de agora, oito persoas foron arrestadas por unha variedade de delitos, incluídos desorde violenta e roubo", agregou.

Barron indicou que se iniciou unha investigación para identificar os responsables da violencia. Centos de persoas reuníronse onte á noite na praza Keel, de Sunderland, moitas delas envoltas en bandeiras inglesas, e corearon o apoio a Tommy Robinson, fundador do grupo de extrema dereita Liga de Defensa Inglesa mentres que outros berraron insultos contra o Islam.

Malia que o imputado polo acoitelamento, de 17 anos, naceu en Cardiff, en Gales, nunha familia de refuxiados ruandeses, comentarios falsos nas redes afirmaban que era un solicitante de asilo sirio, vixiado polos servizos de intelixencia.

Algúns integrantes da protesta prenderon lume a un automóbil, outros atacaron unha mesquita, mentres que un edificio contiguo a unha comisaria foi incendiado.

Ademais, os participantes na protesta atacaron a axentes antidisturbios con diversos obxectos, como pedras e latas de cervexa. A ministra británica de Interior, Yvette Cooper, dixo en X que quen recorre á violencia "non representan ao Reino Unido".

"Os criminais que atacan a policía e avivan a desorde nas nosas rúas pagarán o prezo pola súa violencia. A policía ten todo o respaldo do Goberno para tomar as medidas máis enérxicas posibles", agregou.

O club de fútbol inglés Sunderland AFC colgou unha mensaxe na súa conta de X para recalcar que "as vergonzosas escenas de onte á noite non representan a nosa cultura, a nosa historia nin a nosa xente. A nosa gran cidade está baseada na unión e a cooperación".

O deputado da circunscrición de Sunderland Central, o laborista Lewis Atkinson, cualificou os disturbios provocados por seguidores de extrema dereita de "violencia criminal".

"Estou consternado pola desorde no centro de Sunderland" e "a nosa cidade non está representada por unha pequena minoría que causa problemas", escribiu Atkinson en X.

O agresor do ataque en Southport foi identificado como Axel Rudakubana, un mozo de 17 anos nado en Gales de pais ruandeses.

Os incidentes de onte á noite seguiron aos rexistrados o pasado martes pola noite en Southport, onde seguidores de extrema dereita tamén incendiaron un vehículo e atacaron unha mesquita. Segundo os medios, estes grupos planean outras concentracións esta fin de semana en varias cidades inglesas, pero a Policía xa advertiu de que despregará toda a forza que sexa necesaria para conter calquera incidente violento.

O primeiro ministro, Starmer non quixo agardar a que a crise se lle vaia das mans. Non pasaron nin 24 horas desde o arresto de máis dun cento de radicais nas proximidades de Downing Street, a súa residencia oficial para convocar aos xefes da policía coa intención de coordinar unha resposta integrada ante os disturbios e difundir unha mensaxe de man dura contra os seus promotores.

A alerta esténdese esta fin de semana aos corpos policiais de todo o país, aos que Starmer lles garantiu poderes e recursos para frear os altercados violentos.

Policía e manifestantes violentos en Sunderland (Inglaterra)