Trinta patrullas do exército vixiarán os oito distritos forestais de máis risco de incendio

A operación Sentinela Galego contra os incendios forestais desprega en Galicia 30 patrullas do Exército de Terra e da Armada a partir do 15 de agosto. Os militares colaboran coa Xunta e as forzas de seguridade nos labores de vixilancia do monte e de disuasión dos incendiarios. Hai xa 17 anos que comezou aquí esta experiencia de colaboración á que este verán se suman as illas Canarias.

Na base da Brigada Helitransportabe do Campiño, en Pontevedra, os responsables da Brilat presentaban hoxe os medios que destinan este ano á operación.  Son xa 17 veráns de traballo conxunto, nunha colaboración que xurdiu tras a vaga de incencios de 2006 e que se desenvolve nos oito distritos forestais con maior risco ata o 30 de setembro.

Día e noite, as patrullas vixían máis de 4.400 quilómetros cadrados de monte. Son da Brilat e tamén da Infantería de Mariña, a maioría militares galegos que se suman voluntariamente á misión.

 "Coñecen a contorna, os veciños, as corredoiras, e isto facilita moito o seu labor. O pasado fixemos 2.500 patrullas, percorrimos 275.000 quilómetros e contribuímos con 80 avistamentos de posibles focos ou incidencias",  declarou Alfonso Pardo, o xefe da BRILAT

O programa de prevención inclúe tamén a despregadura dun avión Raven que pode sobrevoar os incendios e ofrecer en tempo real imaxes que lles facilitan ás brigadas. Son medios que se suman aos da Xunta: 30 medios aéreos e 380 motobombas, aos que este ano se unen 6 máquinas polivalentes deseñadas polo propio servizo. 

 "Os nosos profesionais están recoñecidos a nivel internacional. E esta extensión da operación Sentinela ás illas Canarias da fe dese bo traballo que se está a realizar aquí", engadiu María José Gómez, a conselleira do Medio Rural

A operación é prorrogable. O Estado pon tamén á disposición da Xunta 10 avións e, no caso de ser necesaria, a Unidade Militar de Emerxencias.