Trump pausa durante 90 días os aranceis, deixándoos nun 10 %, pero eleva os da China ao 125 %

O presidente dos Estados Unidos, Donald Trump, anunciou este mércores unha pausa de 90 días na aplicación dos aranceis decretados o 2 de abril a todos os países que iniciaron negociacións para abordar as súas disputas comerciais e a súa substitución temporal por un gravame do 10 %, á vez que incrementou ao 125 % os de China.

Trump xustifica a pausa asegurando que "a xente estaba asustándose un pouco".

Faino "ante a falta de respecto" que na súa opinión, mantén A China cara aos mercados. O anuncio chega poucas horas despois de que A China respondera impoñendo aranceis dun 84 % aos produtos estadounidenses.

"Baseándome na falta de respecto que a China mostrou aos mercados mundiais, elevo o arancel cobrado á China polos Estados Unidos de América ao 125 % con efecto inmediato. Nalgún momento, esperemos que nun futuro próximo, A China darase de conta de que os días para estafar os EUA e outros países xa non son sostibles ou aceptables", engadiu.

Trump, anunciou tamén que durante 90 días rebaixarán ao 10 % os aranceis a aqueles países que non tomaron represalias comerciais contra o seu plan e buscaron solucións negociadas.

A Casa Branca confirmaba pouco despois que esta medida inclúe tamén a Unión Europea, á que lle adxudicara un 20 % de gravame. 

O republicano explicou na súa rede social Truth Social que a súa decisión obedece a que máis de 75 países buscaron negociar con Washington e "non tomaron represalias de ningunha maneira contra os Estados Unidos".

"Máis de 75 países chamaron a representantes dos Estados Unidos [...] para negociar unha solución aos temas que se están debatendo en relación co comercio [...]. Para as nacións que por suxestión miña non tomaron represalias de ningún tipo contra os Estados Unidos autoricei unha pausa de 90 días e un arancel recíproco notablemente reducido durante este período do 10 %", informou Trump mediante un post na rede social Truth Social.

Un anuncio que sorprende porque chega poucas horas despois de que Trump se mofara o mércores pola noite das decenas de países que contactaron coa Casa Branca para buscar unha solución negociada aos aranceis.

"Estes países están a chamarnos. Están a bicarme o traseiro. Morren por chegar a un acordo", dixo Trump ante o Comité Republicano.

Trump agudizou o mércores pasado a súa guerra comercial ao anunciar o 10 % de aranceis para case todos os países do mundo, máis gravames adicionais para algunhas nacións e bloques comerciais, como a Unión Europea (UE), cuxa tarifa total ascende ao 20 %.

Os aranceis do 10 % entraron en vigor o sábado pasado e os adicionais este mércores. 

Acusacións da China

Pola súa banda, a China acusou os Estados Unidos, durante unha reunión na Organización Mundial do Comercio (OMC), de violar as normas comerciais internacionais e de debilitar o sistema multilateral de comercio cos seus chamados aranceis recíprocos.

A delegación de China sostivo que non hai "reciprocidade" no aumento xeral de aranceis ditado polo presidente Donald Trump, senón unha priorización dos intereses de Estados Unidos, en prexuízo dos dereitos lexítimos doutros países.

México e O Canadá non se verán afectados

A Casa Branca asegurou que non se aplicarán aranceis do 10 % contra México e O Canadá, rectificando o dito pouco antes polo secretario do Tesouro estadounidense, Scott Bessent.

"Ningún destes dous países recibirá o nivel base do 10 % neste momento", informou un funcionario da oficina presidencial estadounidense.

Pouco antes, Bessent respondera de forma afirmativa ao ser preguntado sobre se México e Canadá estaban incluídos no esquema arancelario anunciado polo presidente estadounidense, Donald Trump.

Cando o pasado 2 de abril Trump anunciou o que chamou "aranceis recíprocos" que implicaron taxas xeneralizadas do 10 % e uns volumes superiores para outras rexións e países, México e Canadá xa quedaron fóra da lista de países castigados.