Antigas palleiras rehabilitadas para vivendas en alugueiro en Parada de Sil
Trátase dunha iniciativa do concello para facer fronte á escasa oferta e conseguir asentar poboación no rural
O traballo de rehabilitación recibiu varios recoñecementos a nivel arquitectónico
Antigas construccións, sobre todo palleiras, que estaban case en ruínas na aldea de Fondo de Vila, en Parada de Sil, volven agora ter vida.
O concello decidiu rehabilitar todo este conxunto e transformalo en vivendas en alugueiro a prezos accesibles. Son en total cinco, de un, dous ou tres dormitorios, e xa levan meses ocupadas por outras tantas familias.
Marisa González é a inquilina dunha delas. Orixinaria da zona optou por regresar tras quedar sen traballo durante a pandemia. Agora xa está xubilada. É consciente da dificultade de atopar casa neste concello da Ribeira Sacra debido á escasa oferta de alugueiro e aos elevados prezos. Afirma que cada vez hai máis traballo pero que moita xente decide non vir polos problemas de vivenda.
Facerlle fronte a esta realidade e conseguir que se asente poboación na zona é o obxectivo desta iniciativa do concello de Parada de Sil que traballa xa na rehabilitación doutros dous inmobles tamén para alugueiro preto da capitalidade.
A rehabilitación do conxunto de Fondo de Vila, que conta con varios espazos comúns, recibiu varios premios pola capacidade para reunir tradición e modernidade.
