Ucraína denuncia un ataque ruso nun mercado de Donetsk con, polo menos, 17 mortos

Polo menos 17 persoas morreron e máis de trinta quedaron feridas como consecuencia dun ataque do que as autoridades ucraínas acusan a Rusia contra o mercado central de Kostiantinivka, na provincia de Donetsk do leste de Ucraína.

“O inimigo alcanzou o mercado central de Kostiantinivka, na rexión de Donetsk”, di a información publicada pola axencia de noticias ucraína Ukrinform, que cita como fonte a Administración Militar deste óblast parcialmente ocupado por Rusia, polo que pasa a liña da fronte.

O masacre foi condenado polo presidente ucraíno, Volodímir Zelenski, quen dixo que "neste momento, a artillería dos terroristas rusos matou 17 persoas na cidade de Kostiantinivka, na rexión de Donetsk”.

O xefe do Estado ucraíno publicou xunto á súa mensaxe un vídeo onde se ve o momento da deflagración e algúns dos seus devastadores efectos sobre o mercado.

O ministro do Interior, Ihor Klymenko, declarou que os labores de procura e rescate concluíron.

Unha vintena de tendas, unha liña de transmisión eléctrica, un edificio administrativo e outro de vivendas sufriron danos no ataque, que destruíu automóbiles e varios postos do mercado, segundo a Fiscalía.

“Un mercado normal. Tendas. Unha farmacia. Xente que non fixera nada malo. Moitos feridos. Por desgraza, o número de mortos e feridos pode aumentar”, escribiu Zelenski, que criticou na súa mensaxe a quen “aínda tenta” contemporizar con Rusia. “Significa pechar os ollos a esta realidade”, agregou.

O presidente ucraíno cualificou de "inhumano" e "perverso" este novo ataque letal das forzas rusas contra poboación civil ucraína.