Un 36 % dos españois cría que Sánchez debía seguir na presidencia e un 21 %, dimitir
Un 36 % dos españois cría que Sánchez debía seguir na presidencia e un 21 %, dimitir
A enquisa realizada o venres polo CIS revela ademais que un 23,6 % dos españois cren que o presidente tiña que convocar eleccións
O CIS dá unha vitoria ao PSOE sobre o PP de 9,4 puntos tras a carta de Pedro Sánchez
![](https://img-g24-crtvg.flumotion.com/prog24/2024/20240429/pedrosanchezcomparece.1714401666.83.png)
O 36,7 por cento dos españois pensaba o venres pasado que o xefe do Goberno, Pedro Sánchez, debería explicar "o sucedido" e continuar á fronte do Executivo, un 23,6 % que tiña que convocar eleccións e un 20,9 % que debería dimitir, segundo unha enquisa "flash" do Centro de Investigacións Sociolóxicas (CIS).
O estudo, realizado o venres pasado a partir de 1.809 entrevistas telefónicas despois de que o líder socialista anunciase nunha carta que collía cinco días de reflexión sobre o seu futuro político, revela ademais que un 11,7 % consideraba que Sánchez debía someterse a unha cuestión de confianza no Congreso.
A mostraxe, chamada "Enquisa flash situación política española", pregunta polos principais argumentos do contido da carta, e conclúe que o 44,6 % non apoia o "xesto" e a "actitude" do presidente de facela pública, fronte a un 43,1 % que si o apoia; un 41,1 % considera que "ten razón" no que expón e un 38,8 % que non a ten.
Ademais, un 52,8 % asegura que "a vida política está a converterse en algo moi duro e insoportable" aínda que o 32,5 % pensa que "isto é así pero só nalgúns aspectos pero non tanto noutros" e un 5% nega esta premisa.
Doutra banda, o 48,2 % opina que "a apertura dunha causa xudicial por unha causa particular contra a súa muller, Begoña Gómez" é "unha maneira de meterse con Pedro Sánchez e tentar facerlle dano".
Un 30,5 % cre con todo que está "xustificada" a apertura de dilixencias contra Begoña Gómez, mentres que o 6,5 % afirma non ter suficiente información sobre o caso.
Respecto á misiva en si, dada a coñecer polo presidente na tarde do pasado mércores, o 83,8 % sabía da súa existencia, un 27 % léraa e o 58 % coñecía o seu contido. Non sabía nada da carta de Sánchez o 14 % dos entrevistados.
O CIS dá unha vitoria ao PSOE sobre o PP de 9,4 puntos tras a carta
Esta mesma enquisa sitúa o PSOE como gañador nunhas eleccións nas que sacaría 9,4 puntos ao PP.
A mostraxe dá a volta ao último barómetro do CIS do mes de abril, cando os populares gañaban cun 33,5 por cento dos votos.
Agora, nun estudo cunha mostra máis reducida de 1.809 entrevistas telefónicas realizadas o pasado venres, a estimación de voto para o PSOE sería do 38,6 por cento dos sufraxios, a gran distancia dun PP que quedaría no 29,2 por cento.
Vox sería a terceira forza co 11 por cento do voto estimado (10,1 no barómetro de abril) e Sumar perdería respaldo, posto que esta enquisa lle concede un 7,2 por cento cando no barómetro mensual obtiña o 8,2 por cento.
Podemos tamén rebaixa o seu apoio, ao caer do 3,1 % ao 2,6, mentres que os independentistas de Junts seguirían igual, co 1,4 %, e ERC baixaría dúas décimas ata o 1,2 por cento.
Os partidos políticos vascos tamén perden apoios, que no caso do PNV pasan do 1% ao 0,5, e en EH Bildu, do 0,9 % ao 0,6.