Moscova acusa o exército de Ucraína de derrubar un avión ruso en Bélgorod
Moscova acusa o exército de Ucraína de derrubar un avión ruso en Bélgorod
As autoridades rusas confirman a morte dos 74 ocupantes do avión militar ruso estrelado en que viaxaban 65 prisioneiros de guerra ucraínos
Ucraína non confirma nin desminte a súa responsabilidade e limítase a dicir que investigarán se realmente os presos ían na aeronave
Un avión ruso de transporte militar Il-76 con 65 prisioneiros ucraínos a bordo estrelouse este mércores na rexión fronteiriza de Bélgorod, informou o Ministerio de Defensa de Rusia en Telegram.
A nota castrense precisa que o avión, en que tamén viaxaban seis tripulantes e tres militares rusos, transportaba os prisioneiros para o seu troco por soldados rusos retidos polo exército ucraíno. O gobernador da rexión confirmou xa o falecemento de todos os ocupantes da aeronave.
O portavoz do Kremlin, Dimitri Peskov, explicou que as autoridades traballan xa para esclarecer as circunstancias deste incidente, que se produciu contra ás 11:00, hora local a uns 50 quilómetros da fronteira ucraína.
Foi a uns cinco quilómetros da aldea de Yáblonov, onde non causou danos persoais nin materiais, segundo informaron residentes locais á axencia TASS.
O Ministerio de Defensa de Rusia acusou o exército ucraíno de derrubar o Il-76, un trirreactor pesado de transporte militar.
"O avión foi alcanzado polas Forzas Armadas de Ucraína desde a zona da localidade de Liptsi, na rexión de Khárkiv, co uso de sistemas de mísiles antiaéreos", sinalan nun comunicado.
Os radares rusos detectaron o lanzamento por parte de Ucraína de dous mísiles, din na nota, aínda que non precisa se os dous alcanzaron o seu obxectivo.
Imaxe de arquivo dun avión similar ao accidentado este mércores
Versión ucraína
Pola súa parte, fontes militares ucraínas, citadas pola axencia pública Ukrinform, asegurou nun primeiro momento que o que realmente transportaba a aeronave eran mísiles para os sistemas antiaéreos S-300 que Rusia emprega regularmente para bombardear Ucraína.
Non obstante, co paso das horas xa non mantiveron esa afirmación e tampouco negaron a súa responsabilidade no derrubamento do avión ruso. Limitáronse a asegurar que investigarán se realmente na aeronave viaxaban 65 prisioneiros de guerra ucraínos.
Si confirmaron que este mércores estaba previsto un intercambio de prisioneiros entre Ucraína e Rusa.
