Un home ferido grave en Ourense tras ser agredido cun machete na cabeza

A maxistrada do Xulgado de Instrución nº3 de Ourense decretou o ingreso en prisión comunicada e sen fianza dun dos dous detidos por agredir outro mozo á saída dunha discoteca.

Está acusado dun delito de tentativa de homicidio e doutro de tenencia ilícita de armas.

O outro dos arrestados por este caso quedou en liberdade investigado por un delito de encubrimento, sen prexuízo de que poida cambiar ao longo da instrución.  

A agresión aconteceu nas inmediacións dunha coñecida discoteca da zona de marcha de Ourense ruante a fin de semana. Alí, presuntamente, durante unha liorta dous mozos golpearon a outro na cabeza cun machete duns corenta centímetros.

Cando chegaron os axentes, os presuntos autores da agresión xa escaparan cara á zona dos viños. 

Foi a propia vítima a que conseguiu identificalos. Fontes próximas á investigación aseguran que se trata de dous mozos de 20 e 25 anos.

A vítima, ferida de gravidade na cabeza, ensinoulles aos axentes unha fotografía dos seus agresores. A un deles atopárono pouco despois na rúa. Dixo que nada tiña que ver coa agresión e que o responsable fora o seu compañeiro de piso. 

O outro home entregouse sen opoñer resistencia cando a policía foi á súa casa. O presunto agresor ten antecedentes por delitos similares.