Os bombeiros dan por controlado o incendio na Somerset House de Londres
Os bombeiros dan por controlado o incendio na Somerset House de Londres
Non se rexistraron danos persoais nin lle afectou á zona da galería de arte
A intensa fumareda sobre o centro da cidade alertou os londinienses
Un incendio no teito do edificio Somerset House, en Londres, mobilizou máis dun cento de bombeiros para sufocar as lapas e obrigou a pechar este centro de arte. Aínda que provocou unha fumareda importante sobre o centro da cidade non se notificaron danos persoais.
O lume prendeu na parte alta do emblemático edificio e os bombeiros tiveron que empregar grandes escadas e un guindastre para chegar á zona afectada e 15 camións para combater as lapas.
O lugar foi evacuado e pechado ao público. Segundo declarou o director do centro, o incendio non lle afectou á zona das obras de arte, polo que poderá abrir este domingo as súas portas de novo nesa área, onde está a Galería Courtauld que alberga unha colección de famosas pinturas, entre as que se atopa o 'Autorretrato coa orella vendada e cabalete' do pintor postimpresionista holandés Vincent Van Gogh e outras obras de Manet, Monet o Cezanne, entre outros.
A última hora da tarde os bombeiros anunciaban que o lume quedaba baixo control, e que requiriu un traballo complexo e técnico debido ao deseño e a antigüidade do edificio.
