Un incendio sen vítimas deixa á deriva un transbordador con 411 persoas preto de Eivisa
Un incendio sen vítimas deixa á deriva un transbordador con 411 persoas preto de Eivisa
O lume declarouse nunha área de acceso restrinxido á tripulación e foi xa apagado, aínda que continúa habendo zonas quentes
O transbordador, no que viaxan 350 pasaxeiros e 61 tripulantes, será remolcado cara a Valencia
![O transbordador GNV canda unha embarcación de Salvamento Maritimo (Fonte: Salvamento Marítimo)](https://img-g24-crtvg.flumotion.com/prog24/2024/20240708/transbrodadorincendiado_salvamentomaritimo.jpg)
Un incendio declarado ás 02:30 horas no transbordador Tenacia, da navieira GNV, deixou á deriva o buque en que viaxan 350 pasaxeiros e 61 tripulantes.
A embarcación cubría a ruta Valencia-Palma e atopábase a unhas 22 millas de Eivisa cando se produciu o incidente. Todos os seus ocupantes saíron ilesos.
Segundo informou Salvamento Marítimo, o incendio produciuse nunha área de acceso restrinxido á tripulación. Foron os bombeiros do buque os que interviñeron en primeira instancia para conter o lume. De inmediato se puxo en marcha o protocolo de seguridade e se reuniu aos viaxeiros nos puntos de encontro establecidos.
O lume quedou controlado durante a noite e sufocado este luns a media mañá, pero permanecen aínda zonas quentes. Na súa extinción traballou unha dotación de tres bombeiros da Generalitat de Cataluña. Outras dúas desprazáronse ata o buque en helicóptero. Ademais, na operación participan dous buques Salvamar, dous remolcadores e tres helicópteros.
Tanto a pasaxe coma a tripulación permanecen no barco, posto que o incendio non se estendeu fóra da zona de máquinas e non se produciron danos persoais.
O buque será remolcado ata o porto de Valencia, segundo confirmou a navieira propietaria do buque. O traslado do barco efectuarase cando se constante que a operación se poda realizar con total seguridade.
O transbordador, que partiu ás 22:30 horas do porto da capital valenciana, tiña previsto chegar a Palma ás 05:15 horas e de alí partir cara a Barcelona contra as 10:00 horas. O barco transporta tamén turismos e camións.
A navieira habilitou un número de atención para os familiares dos ocupantes do buque, o teléfono italiano +390102094599.