Un líder do brazo armado de Hamás morre nun ataque israelí no norte do Líbano

Catro persoas morreron, entre elas un líder do brazo armado de Hamás, nun ataque israelí preto dun campamento de refuxiados palestinos no norte do Líbano.

O diario The Times of Israel, citando medios vinculados ao movemento de resistencia islámica, identifica o falecido como Saeed Atallah, xefe das brigadas al-Qassam, morto xunto a tres membros da súa familia nun ataque contra un edificio preto do campamento Al Beddawi.

O bombardeo produciuse despois de que o Exército xudeu emitira unha alerta para que a poboación dos suburbios do sur de Beirut, o Dahye, evacuara o lugar en previsión de novos ataques contra obxectivos de Hezbollah. 

Segundo a canle de televisión libanesa Al Manar, nas primeiras horas deste sábado tamén se rexistraron agresións armadas nas localidades de Bardala, ao noroeste de Ramallah, e de Burga, preto de Nablus.

Pola súa banda, o grupo xiíita informou de enfrontamentos con tropas hebreas na zona fronteiriza co Líbano, principalmente na aldea de Odaisseh, e na área de área de Yaroun, no sur do Líbano.

Golpe a "terroristas" en Gaza

Os enfrontamentos prodúcense despois de que Israel informara dun golpe a "terroristas" nun centro de control e comando de Hamas situado na escola Ahmad Kurd, no centro da Franxa de Gaza.

Nun comunicado, explicou que levou a cabo esta operación coa axuda da intelixencia militar e que este centro de control e comando estaba dentro dun recinto que "anteriormente servía como  escola", situada en Deir al Balah.

O Ministerio de Sanidade palestino, controlado por Hamás, dixo este venres que polo menos 41.802 persoas morreron en Gaza desde que comezou a guerra o 7 de outubro. Estes datos non inclúen os 10.000 cadáveres que se estima continúan entre os entullos.