Un obradoiro de Pontedeume elabora chocolates gourmet con sabores e aromas galegos
Un obradoiro de Pontedeume elabora chocolates gourmet con sabores e aromas galegos
A materia prima é cacao de comercio xusto e na moenda é onde engaden os sabores
Os primeiros chocolates que lanzou Tomás no seu obradoiro foron os feitos a base de alga percebe traída de Ortigueira ou de eucalipto de Ferrolterra, onde el se criou.
"Son un pouco lembranzas da infancia da zona onde nos criamos", di.
O punto de partida é a escolla do gran de cacao procedente de mercados de comercio xusto.
"Hai un que é da zona do Caribe, de República Dominicana, dunha cooperativa que se chama Oco e outro de Ghana da Cooperativa Aboka", explica o chocolateiro Tomás Rodríguez.
O proceso completo de elaboración ata obter o produto final dura ao redor dun mes. Tralo tostado, sepárase a casca da faba do cacao, que é o que se emprega para elaborar o chocolate.
A moenda é o paso en que se engaden os sabores e aromas. Hainos de crema de augardente, pan de masa léveda, millo e tamén con sabor ao camiño de Santiago.
"Metémoslle améndoa marcona e ten un pequeno toque de canela e limón como a sobremesa tan típica que é a torta de Santiago".
Traballa con produtores locais e vende os seus chocolates gourmet en tendas de proximidade. Agora Tomás xa está a idear novas propostas que sacar ao mercado. Máis variedades de chocolates con sabor e recendo galegos.
