Un profesor de Ourense é condenado a 13 anos e medio por violar unha alumna menor de idade

A Audiencia Provincial de Ourense condenou a 13 anos e medio de cárcere un profesor de 45 anos que abusou sexualmente e violou unha alumna menor de idade. Iniciou o contacto con ela cando tiña entre 11 e 12 anos, a través de Instagram, sen identificarse.

O tribunal, segundo a resolución facilitada á prensa este venres, inhabilitouno durante 21 anos e medio para exercer calquera profesión ou oficio, sexa ou non retribuído, que supoña contacto regular e directo con persoas menores de idade.

Tamén lle impuxo 8 anos e medio de liberdade vixiada para cando saia de prisión e a prohibición de comunicarse por calquera medio e aproximarse á vítima, ao seu domicilio, lugar de estudo ou traballo, durante 20 anos e medio, así como o pago dunha indemnización de 30.000 euros.

Como consta na sentenza, a sala considera probado que abusou da vulnerabilidade da vítima, derivada da súa situación familiar e da súa superioridade e que, tras desvelarlle a súa identidade, realizou prácticas sádicas con ela e, nunha ocasión, propinoulle unha malleira e abandonouna.

Engade a sentenza que contactou con outras estudantes, ás que se presentaba como unha figura de apoio, para despois pretender que lle enviasen fotografías ou vídeos delas espidas ou en prácticas sexuais.

O tribunal atribúelle un delito do artigo 183.2 do Código penal, isto é: “O que a través de Internet, do teléfono ou de calquera outra tecnoloxía da información e comunicación contacte cun menor de dezaseis anos e realice actos dirixidos ao engano para que lle facilite material pornográfico ou lle mostre imaxes pornográficas nas que apareza ou se represente un menor”. Así como dun delito continuado de abusos sexuais a menor de dezaseis anos dos artigos 183.3 e 4.d) e un delito de violación do artigo 179.

O home foi profesor desde educación infantil ata primaria, etapa durante a cal contactou con ela cando estaba en sexto de primaria, “ocultando a súa verdadeira identidade e o seu aspecto” iniciando, entre ambos, “unha relación virtual na que o acusado se presentaba como un apoio emocional para ela, tentando axudala a solucionar os seus problemas para, despois, pedirlle fotos espida e vídeos”. Desde que a menor tiña 12 anos, segundo a sentenza, envioulle fotos espida e vídeos sexuais.

O tribunal ourensán sinala que, tempo despois, tras a insistencia da vítima para que lle revelase a súa identidade, pediulle que fose á aula de música, descubrindo entón que a persoa coa que estivera comunicándose fora o seu profesor de música en primaria.

“A menor quedou en estado de shock, e o acusado abrazouna, díxolle que a quería moito, que el a apoiaba, sentouna sobre as súas pernas e bicouna na boca. A partir dese momento, conseguiu quedar con ela en varias ocasións no colexio”, indican os xuíces, que afirman que durante eses encontros realizou prácticas sexuais coa menor, ademais de propinarlle “labazadas e azoutes, a modo de práctica sádica”.

Posteriormente, segundo os feitos probados na sentenza, quedou fóra do centro escolar con ela en tres ocasións, nas que abusou dela de forma continuada e violouna. Para quedar, dáballe instrucións, precisándolle onde estaba o seu coche estacionado para que se metese no maleteiro e, desta forma, viaxase escondida.

“Desde o aparcadoiro levouna a un monte e, na segunda ocasión, preto dunha capela, lugares onde lle pegaba como práctica sádica”, afirma o tribunal. Nunha terceira ocasión, en 2021, cando a menor cumprira 16 anos, “tras quitarlle a roupa, deulle fortes puñazos no peito, cu e costelas, implorándolle varias veces a vítima chorando que parase, cesando o acusado finalmente na súa práctica sádica”, sinala a Audiencia Provincial, que relata que, a continuación, realizou prácticas sexuais e abandonouna, prostrada, no lugar, sen preocuparse polo seu estado.

Ante este último episodio, a menor decidiu bloquear o acusado nas redes sociais para non ter contacto con el e, ao renovarse o curso escolar, en setembro de 2021, expuxo os feitos no colexio e formalizou a denuncia ante a Garda Civil.

O profesor, segundo o tribunal, durante todo ese tempo era “perfectamente coñecedor da idade e da fraxilidade emocional da menor, derivada, principalmente, dunha grave problemática familiar, presentándose como unha figura de referencia e apoio, aproveitándose destas circunstancias”. Ademais, subliña que o condenado “ostentaba unha posición de superioridade derivada da diferenza de idade, a súa condición de docente e o ascendente que exercía sobre a menor”.

En canto á declaración da vítima, indica que “vai máis aló da verosimilitude, sendo verídica polo seu vívido e descritivo relato, avalado por múltiples elementos de xuízo, como son a proba pericial tecnolóxica, as testificacións das súas compañeiras e amigas e a pericial de credibilidade do Instituto de Medicina Legal de Galicia (Imelga)”.

Ademais, engade que, aínda que “a malleira que o acusado lle propinou foi unha práctica sádica e non para dobregar a súa vontade”, non cabe dúbida de que con ela “creou un claro contexto de intimidación ambiental, tendo en conta a natural reacción da menor, implorándolle chorando en varias ocasións que cesase”.

A sentenza non é firme, pois cabe presentar recurso ante o TSXG.