Unha familia de Teo é trasladada ao hospital por unha intoxicación de gas
Unha familia de Teo é trasladada ao hospital por unha intoxicación de gas
A causa da intoxicación pódese deber a unha mala combustión da caldeira, xa que días atrás sufrira unha avaría
Cinco membros dunha familia, tres deles menores, foron trasladados ao hospital de Santiago por intoxicación de gas na súa vivenda na Travesía de Cacheiras, no municipio de Teo (A Coruña).
Todos presentaban síntomas comúns como os mareos, aínda que en ningún momento perderon a consciencia.
Segundo apunta o 112 Galicia, a causa da intoxicación pódese deber a unha mala combustión da caldeira, xa que días atrás sufrira unha avaría. Os feitos ocorreron pasada a medianoite, cando o 112 Galicia recibiu a chamada dunha muller que pedía asistencia debido a unha fuga de gas.
Na súa chamada sinalaba que toda a familia se sentía mal. Con esta información, avisouse o 061, os membros do GES de Brión e os Bombeiros de Ordes.
Á chegada do equipo de emerxencias brionés as xanelas da casa xa estaban abertas e a familia fóra. Con todo, reforzaron a ventilación con maquinaria e esperaron a que as medicións resultasen negativas.
Pola súa banda, a dotación do 061 ocupouse do traslado e primeiros coidados dos afectados e a intervención dos bombeiros anulouse porque os medios e recursos aplicados polo GES de Brión eran xa suficientes.
