Máis de 50 desaparecidos e 9 superviventes nun caiuco afundido ao sur do Hierro
Máis de 50 desaparecidos e 9 superviventes nun caiuco afundido ao sur do Hierro
Saíra hai nove días cara ás Canarias cunhas 60 persoas a bordo e envorcou na sétima xornada de navegación
Os nove saíron en ambulancia cara ao Hospital de Valverde para facerlles un control sanitario
Medio cento de inmigrantes de orixe subsahariana desapareceron no Atlántico ao envorcar un caiuco que foi localizado este luns por un mercante a uns 110 quilómetros do Hierro con só nove sobreviventes
O caiuco foi avistado á primeira hora por un petroleiro que facía a travesía desde Brasil a Cartaxena, e que alertou por radio de que había un caiuco semisomerxido. Deseguido saíu un helicóptero de Salvamento Marítimo con base en Tenerife, a Salvamar e unha patrulleira da Garda Civil.
O Helimer 206 recolleu as nove persoas que quedaban a bordo, aferradas como podían a unha embarcación xa medio afundida, da que só sobresaía da auga parte da proa. Os superviventes contaron aos rescatadores do Helimer que levaban dous días así.
De acordo co que contaron no aeroporto, mentres recibían as primeiras asistencias médicas, o caiuco saíra fai nove días cara ás Canarias cunhas 60 persoas a bordo e envorcou no seu sétimo día de navegación.
Os sobreviventes son os únicos que lograron dar a volta ao caiuco e subirse de novo aos seus restos. Os nove saíron en ambulancia cara ao Hospital de Valverde para facerlles un control sanitario.
A Salvamar Adhara seguiu navegando ata o lugar do naufraxio e comprobou que no caiuco non queda ningún corpo. A súa tripulación considerou inviable remolcar os restos da embarcación a terra, polo que regresou cara á súa base no porto da Restinga.
