Viaxes en familia ou escapadas, entre as peticións das cartas aos Reis Magos

Son xornadas moi atarefadas para os Reis Magos, que tamén procuran axuda e asesoramento en lugares coma este: as axencias de viaxes.

"Estamos a notar estes días na nosa oficina a chegada de correos electrónicos desde Oriente para ver como facer viaxes en familia", explica Óscar Regal, director da axencia Embajador Viaxes.

Agasallar unha viaxe é unha opción cada vez máis demandada. As propostas son moi diversas así que as súas maxestades de Oriente teñen máis posibilidades de acertar.

Unha das principais vantaxes é que se escolla o destino que se escolla, a experiencia pódese personalizar.

"Nós non temos un bono específico. O que facemos é un bono ao xeito que demanden, do importe que demanden e logo os clientes que foron agasallados úsano como eles queiran", di Mar Santos, directora de Viaxes Áncora.

O director de Embajador Viaxes engade que "a maioría das axencias galegas temos os bonos agasallo que se poden personalizar en base a unha temática determinada ou un tipo de produto concreto como quen quere un aloxamento especial nunha burbulla ou nunha cabana ata quen agasalla unha viaxe de longa distancia a Asia ou un cruceiro". 

Outra vantaxe: a viaxe agasállase agora, pero pode gozarse ao longo do ano. Deste xeito, atinar co agasallo de Reis pode resultar un pouco máis doado.