Vida noutros planetas? Os astrónomos detectan un gas vencellado a seres vivos nun exoplaneta a 120 anos luz

Cada vez parece máis claro que non estamos sós no Universo, e os científicos acaban de atopar a evidencia máis sólida ata o momento de que pode haber vida noutro planeta.  En concreto, nun exoplaneta situado a 120 anos luz da Terra. Grazas ao telescopio espacial James Webb, os astrónomos detectaron un gas que aquí só producen seres vivos. É a primeira vez que descobren fóra da Terra un elemento tan vinculado con procesos biolóxicos. 

Trátase dun estudo de expertos da Universidade de Cambridge, que avaliaron a información obtida polo Telescopio Espacial James Webb, que observa o exoplaneta K2-18b, situado a 124 anos luz da Terra, unha distancia que necesitaría 187.000 anos para chegar ata alí nunha nave espacial.

Os científicos, que publican esta investigación en 'The Astrophysical Journal Letters', puideron establecer cun 99,7 % de certeza a existencia de vida, pero necesítase alcanzar o 99,99994 % para facer unha declaración definitiva de vida fóra da Terra.

O exoplaneta é dúas veces e media o tamaño da Terra, de acordo con os expertos de Cambridge. O telescopio é capaz de detectar a composición química do K2-18b cando este orbita ao redor da súa estrela, considerada moi pequena en comparación ao noso Sol.

Segundo os investigadores, o James Webb puido detectar sulfuro de dimetilo (DMS) e disulfuro de dimetilo (DMDS), gases que na Terra son xerados polo fitoplancto mariño e as bacterias. O investigador principal, Nikku Madhusudhan, do Instituto de Astronomía de Cambridge, afirmou que o achado achega á humanidade para demostrar que non estamos sós no universo e suxeriu que o planeta pode estar "rebosante de vida".