Vinicius mete a directa e o Real Madrid golea na final da Supercopa (4-1)

Liderado por un Vinicius sensacional, que marcou os tres primeiros goles e orixinou o cuarto, o Real Madrid esnaquizou un Barcelona de cristal (4-1) e conquistou a Supercopa de España xogada en Arabia. 

Os de Ancelotti tiñan unha conta pendente co eterno rival despois da exhibición do Barcelona na final do ano pasado, e recuperárona dun xeito absoluto nun partido dominado desde o asubío inicial. 

Aos dez minutos xa gañaba o Real Madrid con dous goles de Vinicius. Os de Xavi tentaron remontar amasando moita posesión de balón e antes do descanso Lewandowski marcou un gol que lle daba emoción á final. Pouco durou, porque seis minutos despois Vinicius facía a tripla goleadora transformando un penalti. 

No segundo tempo xa non houbo reacción do Barça. O Real Madrid controlou e acabou por sentenciar cun cuarto gol marcado por Rodrygo a pase de Vinicius, o mellor xogador da final.