Vinte intoxicados por fume no incendio rexistrado nun bloque de vivendas de Sevilla

O incendio rexistrado esta mañá nun bloque de vivendas de Sevilla obrigou a asistir unha vintena de persoas por intoxicación de fume e a evacuar seis delas ao hospital. A orixe do lume podería estar nun fallo eléctrico no salón do piso afectado.

O incendio rexistrouse a primeiras horas desta mañá nun bloque de vivendas do barrio da Macarena de Sevilla. O lume iniciouse na primeira planta e estendeuse rapidamente, atrapando unha vintena de veciños.

“Estaba durmindo e a miña filla de catorce anos gritaba: 'Papá, papá, lume'. Asomeime, saía o lume e estábano apagando cun cubo de auga e cada vez había máis lapas, máis lapas e máis lapas”.

Seis persoas, catro delas menores, tiveron que ser evacuadas a un hospital local por inhalación de fume. Outras catorce foron atendidas polos sanitarios no mesmo lugar do incendio.

“Cando me asomei ao balcón o que vin, porque xusto me tapaba unha laranxeira, pero vía as lapas saíndo. E, claro, non me decataba de nada e asusteime, porque dixen: pasa no meu bloque e non me decato de nada”.

As causas que provocaron o incendio están sendo investigadas, pero todo apunta a un fallo nunha extensión eléctrica conectada nun enchufe do salón da vivenda afectada.