O PP gobernará Baleares en solitario tras un pacto con Vox

O PP e Vox alcanzaron un acordo programático que inclúe a abstención do partido de Santiago Abascal para facilitar a investidura como presidenta do Govern balear da líder dos populares Marga Prohens, que formará Executivo en solitario.

Os dous partidos comprometéronse a constituír nun prazo de dous meses unha comisión de seguimento que velará polo cumprimento dos 110 puntos dos que consta o acordo alcanzado este mércores.

As formacións aliadas indicaron ademais que a renuncia para esixir formar parte do Govern autonómico prevé o compromiso do PP de incluír membros de Vox nos Executivos do Consell de Mallorca e o Consell de Menorca, a cambio do voto afirmativo para a investidura como presidentes de Llorenç Galmés e Dolfo Vilafranca, respectivamente.

Prohens será investida presidenta do Govern balear o 6 de xullo

O pleno de investidura celebrarase os días 3 e 4, pero a candidata do PP non sairá elixida en primeira votación porque necesita a maioría absoluta de 30 votos e contará cos dos seus 25 deputados e de 1 de Sa Uniu De Formentera. Por iso, volverá reunir a cámara tras as 48 horas preceptivas e votarase de novo nunha elección que só require de maioría simple.

O pacto recolle a vontade dos dous partidos de favorecer un goberno estable mediante a concreción das políticas acordadas en partidas orzamentarias e coa promesa de Vox de facilitar a aprobación das contas públicas anuais do Govern do PP evitando presentar emendas á totalidade.

O acordo fala da prevención da "violencia contra as mulleres", incluída a que se encadra no ámbito da "violencia intrafamiliar", e avoga pola reforma de todo o sistema de tutela de menores.

Ademais, prevé aprobar antes de que acabe o ano rebaixas dos impostos autonómicos, aumento das axudas sociais, unha ampliación das deducións fiscais existentes e algunhas novas, como unha aos propietarios que poñan vivendas en alugueiro e outra para quen coide maiores de 65 anos.

O imposto de sucesións e doazóns será suprimido antes de 100 días para todas as herdanzas entre pais e fillos, e avós e netos, e reducirase á metade entre irmáns e tíos e sobriños.

PP e Vox tamén pactaron suprimir o imposto de transmisións patrimoniais para a compra da primeira vivenda por parte de menores de 30 anos e ir recortando o imposto de patrimonio ata a súa completa desaparición esta lexislatura.

Derrogación da Lei de Memoria Democrática

Os asinantes do acordo, pechado polos portavoces de ambos os grupos parlamentarios, Sebastià Sagreras polo PP e Idoia Ribas por Vox, comprometéronse á derrogación da lei de Memoria Democrática das illas para substituíla por unha política que evite "a manipulación histórica e o uso partidista das vítimas".

No apartado sobre "eficiencia do gasto público", propóñense contratar "unha auditoría de cada un dos organismos, empresas e entes públicos", da que se derivará a supresión dos que "non reporten beneficios claros para a cidadanía".

Vox avoga por pechar a televisión autonómica e facer un plan de choque contra a inmigración

Respecto á radiotelevisión autonómica, IB3, que Vox avoga por eliminar, o pacto compromete as partes a impulsaren un modelo de medios públicos "racional coa conxuntura económica".

Vox e PP apostan por modificar "as normas que supoñan unha imposición lingüística", garantindo que non saber catalán "non penalice no acceso á función pública", e promoverán o bilingüismo nas comunicacións da administración.

Prevén ademais suspender a aplicación da Lomloe, a gratuidade da educación de 0 a 3 anos, unha estratexia de captación e fidelización de profesionais sanitarios, unha lei de protección á familia que incentive a natalidade e novas deducións por nacemento e adopción de fillos.

Para facer fronte á carestía da vivenda, fuxindo de "políticas intervencionistas", impulsarase o aumento da oferta cun programa de "alugueiro seguro", vantaxes fiscais, simplificación administrativa e construción de vivenda pública.

Outras iniciativas acordadas céntranse na loita contra a okupación, cunha oficina específica para axudar as vítimas, e tamén na inmigración ilegal, enmarcada no capítulo de seguridade, contra a que se aprobará un plan de choque inmediato.