Xa están na casa en Galicia os traballadores que saíron ilesos dun tiroteo en Ecuador
Xa están na casa en Galicia os traballadores que saíron ilesos dun tiroteo en Ecuador
Aterraron a primeira hora deste domingo en Peinador onde os recibiron familiares e amigos, tras facer escala no aeroporto de Madrid-Baraxas
O autocar en que viaxaban recibiu case 20 impactos de bala de seis asaltantes en moto, aos que busca a policía ecuatoriana
Aeroporto de Peinador, en Vigo
Os traballadores galegos tiroteados esta semana por uns asaltantes en Ecuador chegaron este domingo a Vigo procedentes de Guayaquil. Alí varios asaltantes en moto dispararon contra o seu autocar a madrugada do mércores cando regresaban das instalacións nas que traballaban na reparación dun buque da empresa armadora Albacora.
A bordo do vehículo ían 34 operarios, 33 galegos e un vasco que xa puideron regersar a España.
Pasadas as oito da mañá, e despois de facer escala en Madrid, os traballadores do naval aterraron no aeroporto de Peinador, onde foron recibidos por familiares e amigos.
“Foi unha película con final feliz. Deille mil voltas á cabeza lembrando aquel momento, pero o mellor é que todos estamos ben e de volta en casa. Agora toca desconectar e gozar da familia e os amigos", declarou un do traballadores.
O asalto produciuse no cantón de Guayaquil, a onde se desprazaron para traballar na reparación dun atuneiro. O autobús no que viaxaban recibiu case 20 disparos dos seis asaltantes que lles tenderon unha emboscada.
Os gardas de seguridade privada que os protexían repeleron coas súas armas a agresión e todos os que ían no autocar saíron ilesos, polo que puideron regresar ás súas casas en canto lles proporcionaron os billetes de avión.
Axentes ecuatorianos realizan controles na busca dos autores do tiroteo en Guayaquil
