Gómez Besteiro descarta un pacto con outros posibles aspirantes ás primarias do PSdeG

Xosé Ramón Gómez Besteiro, aspirante ás primarias do PSdeG en que se elixirá candidato á presidencia da Xunta, non contempla un pacto nin unha candidatura conxunta co que fora secretario xeral dos socialistas, Gonzalo Caballero, se finalmente se presenta o proceso. 

Nunha entrevista no Galicia por diante da Radio Galega, o deputado socialista por Lugo asegura que non está preocupado se hai máis aspirantes e reivindica un proceso no que hai liberdade para se presentar e para escoller. 

"Paréceme perfecto que se presente moita xente. As primarias teñen esa grandeza de que calquera militante se poida presentar, poida expoñer a súa visión aos militantes socialistas. A pena é que non o poidan facer outros partidos. Por iso estamos vivindo agora situacións coma a do propio presidente Rueda que foi elixido dixitalmente. Non houbo unhas primarias, non houbo posibilidade de confrontar proxectos e agora o que ocorre é que cando un é elixido dixitalmente tamén ten o risco, como está pasando agora, de que o acusen de ser un monicreque de Feijóo, ou, o que é peor, de Ayuso", apuntaba. 

Besteiro di que se presenta "con moita ilusión" e para "cambiar a Rueda, para cambiar a esta Xunta de Galicia. Son 14 anos de oportunidades perdidas e eu iso é o que quero cambiar".

O deputado do PSOE por Lugo apuntaba que no debate de política xeral, celebrado este luns no Parlamento de Galicia, viu "un Goberno esgotado que mira cara a fóra pero botándolle a culpa a todos, a Pedro Sánchez, ao alcalde de Vigo, á alcaldesa da Coruña....; unha Xunta de Galicia que non asume compromisos nin responsabilidades, nin exerce competencias". 

Sobre o seu papel como membro da comisión designada polo PSOE para negociar a investidura de Pedro Sánchez, Besteiro compromete que "vou traballar polos intereses de Galicia". 

Confía o socialista en sumar o voto afirmativo do BNG porque "hai moitas cousas en que podemos coincidir".

Ao preguntarlle sobre a negativa do goberno en funcións a transferir a titularidade da autoestrada AP-9, Besteiro lamenta que se poña o foco no traspaso e non se recoñeza a bonificación das peaxes aprobada polo Goberno de Pedro Sánchez.

Repróchalles aos populares que "cando Rajoy era presidente do Goberno; Núñez Feijóo, presidente da Xunta e Alfonso Rueda, vicepresidente, non se acordaron para nada nin da transferencia nin de bonificar as peaxes. Á xente o que lle preocupa é pagar e foi o goberno de Aznar o que ampliou a concesión". Explica que "nós temos que continuar nesa senda, na de aumentar a capacidade de bonificación e culminar ese proceso de transferencia". 

Sobre unha posible lei de amnistía, Besteiro defende que "o marco constitucional é o que vai presidir as negociacións e a culminación dos acordos. Todo dentro da Constitución, nada fóra da Constitución. Iso é o que vai defender o Partido Socialista e iso é o que vai cumprir o PSOE".