Yolanda Díaz matiza as súas palabras e afirma agora que vai manter o liderado de Sumar

A vicepresidenta segunda Yolanda Díaz mandou unha mensaxe de tranquilidade aos seus seguidores ao salientar que seguirá formando parte da executiva de Sumar, aínda que non como a súa líder, e que continuará coordinando a acción do socio minoritario no seu afán de preservar o Goberno de coalición.

"Non me vou, quedo dentro de Sumar e agora vai darse un debate tranquilo que arrinca o xoves. A esas xentes direilles que ademais facemos isto para gañar nas seguintes eleccións xerais, por tanto preservamos o Goberno de coalición progresista e imos seguir gañando dereitos", afirmou ante a prensa en Suíza tras manter un encontro bilateral co director xeral da OIT, Gilbert Houngbo.

Asumir responsabilidades polo 9X é un exercicio de "boa política"

Cuestionada sobre se as bases de Sumar poden estar intranquilas coa súa renuncia á coordinadora xeral, Díaz insistiu en que "non se vai" do seu proxecto político e que a súa decisión responde a un exercicio de "política da boa", dado que cando hai malos resultados electorais deben asumirse responsabilidades por convicción "ética".

É máis, insistiu en que o paso dado persegue coidar o Executivo de coalición por encima de todo para seguir avanzando na posta en macha de medidas sociais e dar "pasos adiante" co fin de que nas próximas eleccións xerais volva revalidar na Moncloa. Á súa vez, detallou que a súa renuncia como coordinadora xeral responde ao seu compromiso de centrarse na xestión e na "política útil", dado que Sumar ten cinco ministerios que vai seguir coordinando e ten retos como seguir mellorando o salario mínimo.

Sentar as bases para volver vencer nas xerais

Neste sentido, debullou que continúa como presidenta do grupo parlamentario plurinacional e, en consecuencia, mantén o seu rol de referente político do seu espazo. "A política é demasiado importante e isto é o que vou facer. Máis que nunca, vou preservar o Goberno de coalición progresista fronte a quen quere deslexitimar un executivo que sae das urnas e que gañou as eleccións", resolveu.

Posteriormente, fontes de Sumar sinalaron que onte Díaz anunciou que dimitía como coordinadora xeral e que permanecía como membro da dirección do partido e como vicepresidenta segunda e titular de Traballo. O seu obxectivo con esa decisión é centrarse nas tarefas políticas do Executivo e "centrarse así en defender a xente traballadora". Por tanto, estas fontes subliñaron que Díaz, coas súas declaracións desta tarde, manifestou "o mesmo que comunicou onte".