Yolanda Díaz nega unha reforma das baixas laborais: "Coa saúde non se xoga"

A vicepresidenta segunda e ministra de Traballo e Economía Social, Yolanda Díaz, pediu "tranquilidade" aos traballadores e traballadoras españolas en relación á reforma das baixas laborais, xa que asegurou que a saúde laboral "é un dereito fundamental" co que o Goberno "non xoga".

Así o declarou Díaz tras a súa visita ás instalacións de Inditex en Arteixo, ante as preguntas dos medios despois de que o pasado xoves a ministra de Inclusión, Seguridade Social e Migracións, Elma Saiz, anunciase a súa intención de abordar unha reforma das baixas laborais, para dar máis flexibilidade en supostos que permitan incorporarse á actividade no traballo.

Díaz asegurou que aínda non se reuniron para abordar este tema pero foi tallante e afirmou que os traballadores "poden estar tranquilos" porque "non vai haber modificacións que empeoren o que a día de hoxe é un dereito fundamental dos traballadores e traballadoras".

Segundo expresou, as baixas laborais non están suxeitas "ás condicións nin de pluriactividade nin de parcialidade", e insistiu en que os traballadores "cotizan para ter protexida a saúde".

"Coa saúde non xoga", engadiu a ministra, e puxo como exemplo a Inditex, que "dedica parte dos seus recursos a prevención en saúde".

O anuncio de flexibilización da baixas laborais xa espertou reticencias entre os sindicatos e o rexeitamento da vicepresidenta segunda, unha postura ante a que a titular de Seguridade Social subliñou que se trata de competencias do seu Ministerio, pero que buscará o consenso con todas as partes.