División entre os partidos sobre convocar ou non eleccións tras a dimisión de Costa

Os partidos políticos en Portugal móstranse divididos sobre a posibilidade de convocar eleccións anticipadas tras a dimisión do primeiro ministro, o socialista António Costa, unha decisión que deberá tomar o presidente luso, Marcelo Rebelo de Sousa.

Rebelo de Sousa convocou os partidos este mércores para discutir a situación e falará ao país o xoves, tras consultar tamén o Consello de Estado, pero as diferentes formacións políticas xa empezaron a avanzar as súas posicións.

A maioría, especialmente á dereita do hemiciclo, móstranse partidarios de disolver o Parlamento e ir ás urnas. "A degradación do Goberno impón que non se perda máis tempo e que se devolva a palabra ao pobo", apremou o presidente do PSD, Luís Montenegro, que lidera a oposición conservadora.

Desde o ultradereitista Chega, André Ventura tamén dixo que "é o momento en que os portugueses deben ser chamados novamente ás urnas para decidir se queren manter este Goberno ou renovalo".

Tamén avogou por ir ás urnas Iniciativa Liberal: "Non creo que haxa outra solución neste momento que non sexa a disolución da Asemblea da República e as eleccións para que os portugueses poidan pronunciarse", sinalou o seu líder, Rui Rocha.

A portavoz do Bloque de Esquerda, Mariana Mortágua -antigos socios de Costa-, dixo que en democracia "as crises políticas desta natureza resólvense convocando eleccións".

Con todo, a opinión do outro exsocio dos socialistas é diferente. "O país non necesitaba eleccións, senón solucións", sinalou o secretario xeral do Partido Comunista Portugués (PCP), Paulo Raimundo, que aínda así asegurou que están "preparados" para enfrontarse aos comicios se finalmente se convocan

A líder do animalista PAN, Inês Sousa Real, mostrou "preocupación" ante a posibilidade que de que o país volva ás urnas en pleno debate do orzamento do Estado e esperará a que o presidente explique as "solucións" que ten en mente.

Os socialistas de Costa non se posicionaron a favor ou en contra das eleccións e din estar preparados para calquera escenario, segundo o seu presidente, Carlos César, que destacou que o primeiro ministro foi "exemplar" ao decidir dimitir cando soubo que estaba a ser investigado.

Investigado por corrupción

Costa dimitiu este martes pola investigación na súa contra por posible prevaricación, corrupción activa e pasiva e tráfico de influencias en negocios de litio e hidróxeno, aínda que asegurou que non cometeu ningún acto ilícito.

O socialista, primeiro ministro desde 2015, estaba na súa terceira lexislatura e gobernaba con maioría absoluta desde 2022, cando venceu nunhas eleccións convocadas de forma anticipada despois de non conseguir sacar adiante uns Orzamentos.

Tras a súa dimisión, compete ao presidente Rebelo de Sousa decidir o futuro do país. Entre as opcións, podería disolver o Parlamento e convocar eleccións, pero tamén optar por manter un Goberno socialista cun novo primeiro ministro.

Con todo, na última investidura de Costa, cando se falaba da posibilidade de que saíse a metade de lexislatura para aspirar a un cargo europeo, Rebelo de Sousa xa avisou de que se non terminaba o seu mandato convocaría novos comicios. "Non será fácil que a cara que venceu poida ser substituída a metade do camiño", dixo entón.