Evoluciona favorablemente o incendio de Valencia, pero duplícanse as hectáreas queimadas
Evoluciona favorablemente o incendio de Valencia, pero duplícanse as hectáreas queimadas
As hectáreas arrasadas dan un salto ata as 2600 por un erro previo no cálculo
Mentres se investiga se o lume foi intencionado, a maioría dos desaloxados volveron aos seus fogares
O factor humano estaría detrás do incendio que afecta ao termo valenciano de Montitxelvo e varios concellos dos arredores. Iso é o que transmitía a Delegación do Goberno nesta comunidade sen máis concrecións polo de agora. Son unhas 2.600 as hectáreas queimadas dende o xoves e o lume está lonxe de remitir. Iso si, por primeira vez prevalece o optimismo.
"Podemos dicir que está evolucionado favorablemente. Seguimos traballando para a estabilización do perímetro e agora mesmo a que temos máis activa é a cabeza do incendio", explicaba a primeira hora da tarde José Miguel Basset, xefe do Consorcio Provincial de Bombeiros de Valencia.
A diminución da intensidade do vento e un aumento da humidade facilitaron a extinción das lapas:
"As condicións meteorolóxicas permitiron que teñamos cinco medios aéreos agora mesmo voando e realizando labores de extinción", sinalaba Elisa Núñez, conselleira valenciana de Xustiza e Interior.
Eses medios aéreos tamén permitiron facer unha radiografía das áreas afectadas e da súa situación. Aí saltou unha sorpresa: o perímetro do incendio é de 60 quilómetros e non de 30 como se estimaba. O cómputo das hectáreas queimadas tamén se disparaba.
Dende un altofalante escóitase que remata o confinamento na praza maior de Potries, un dos concellos que están na zona do incendio. Esta mensaxe é a que moitos agardaban. Pola tarde Emerxencias levantaba as restricións e o confinamento nos municipios da área e permitía o regreso dos veciños desaloxados, agás en dúas urbanizacións.
