Sánchez logra o apoio de Coalición Canaria e garante 179 si na investidura
Sánchez logra o apoio de Coalición Canaria e garante 179 si na investidura
É o último voto a favor que lles faltaba por explorar aos socialistas, tras conseguir o apoio de Sumar, ERC, EH Bildu, BNG, Junts e PNV
Coalición Canaria di que asina o pacto polo que supón para a comunidade e que o acordo recolle explicitamente que non apoiarán a amnistía
Sinatura do acordo entre María Jesús Montero e David Toledo (EFE/Fernando Villar)
O PSOE e Coalición Canaria chegaron a un acordo para a investidura de Pedro Sánchez como presidente do Goberno.
O acordo coa formación canaria para que a súa única deputada, Cristina Valido, apoie a investidura de Sánchez é o último que lle faltaba por explorar aos socialistas tras conseguir o apoio de Sumar, ERC, EH Bildu, BNG, Junts e PNV.
Desta forma, Sánchez conseguirá previsiblemente 179 votos a favor no debate de investidura, tras lograr superar as reticencias de Coalición Canaria a dar o seu apoio debido ao seu rexeitamento á lei de amnistía.
Coalición Canaria asegura que asina un texto que subscribe "con cabeza" polo que supón de avance na axenda canaria pero "sen corazón" ao deixar claro, Cristina Valido, que o seu partido rexeita a lei de amnistía.
En declaracións aos medios tras subscribir, no Congreso, Valido explicou que o acordo supón unha mellora nas infraestruturas educativas e obras hidráulicas, pero tamén inclúe que autobuses e tranvías serán gratis a partir do 31 de decembro de 2023, e sen data límite.
O acordo, segundo Valido, tamén recolle modificacións na lei de acollida aos menores migrantes non acompañados para que non sexa competencia exclusiva das Canarias.
Ademais, inclúe máis diñeiro para combater a pobreza, a consolidación do 75 % ao transporte aéreo e establecer nos próximos dous anos un novo modelo de financiamento autonómico que garanta a suficiencia financeira de servizos públicos básicos (educación, sanidade e servizos sociais-dependencia).
Con todo, Valido remarcou que o acordo asinado recolle, explicitamente, que CC non apoiará a amnistía, e insistiu nisto para que "non quede marxe de dúbida de que non avalará esta cuestión".
"Nós non estamos aquí para que o PSOE cumpra os seus obxectivos, nin para que a dereita consiga. Estamos aquí para que se entenda e atenda as Canarias", sinalou.
A deputada insistiu en que adoptaron esta decisión "con racionalidade e frialdade" pensando no que beneficia a axenda canaria e conseguir que o Goberno se comprometa cos asuntos da autonomía.
