O Constitucional suspende os artigos da Lei do litoral de Galicia recorridos polo Goberno
O Constitucional suspende os artigos da Lei do litoral de Galicia recorridos polo Goberno
O pleno do TC admite a trámite o recurso de inconstitucionalidade e deixa sen efecto os artigos impugnados ata que resolva a reclamación do Executivo central
O Goberno reclama á Xunta "buscar solucións e volver ao diálogo"
![](https://img-g24-crtvg.flumotion.com/prog24/2022/20221215/litoral_151222.png)
O Pleno do Tribunal Constitucional acordou admitir a trámite o recurso de inconstitucionalidade interposto polo Goberno contra diversos preceptos da Lei 4/2023, do 6 de xullo, de ordenación e xestión integrada do litoral de Galicia.
O Tribunal, tras invocar o Goberno no seu recurso o artigo 161.2 da Constitución, suspendeu a vixencia e aplicación dos preceptos impugnados desde a data de interposición do recurso (11 de outubro de 2023).
O Goberno recorreu, entre outros, diversos apartados dos artigos 1, 2, 3, 11, 12, 21, 22, 23, 24, 25, 27, 29, 34, 35, 36, 40, 41, 46, 48, 49, 52, 53, 55, 57, 58, 59, 60, 62 e 64 da citada norma.
Na súa demanda, o Executivo central sostén que os artigos impugnados poderían vulnerar as competencias do Estado ata o punto de incorporar o mar "de maneira unilateral" ao territorio de Galicia.
O Executivo aduce ademais que a lei "reduce a protección dos terreos contiguos á ribeira do mar", alegando que "as comunidades autónomas poden ir máis alá da protección do litoral, pero nunca ir a menos".
Moncloa tamén alega que os preceptos impugnados poderían vulnerar as competencias do Estado sobre o procedemento administrativo común, a lexislación básica sobre contratos e concesións administrativas, pesca marítima, mariña mercante e competencia sobre medio ambiente.
Cabe lembrar que a semana pasada, o TC xa admitiu a trámite a impugnación do Executivo contra outra lei galega (a 7/2022) que concede á Xunta competencias na xestión das costas, acordando ao mesmo tempo a suspensión dos artigos impugnados.
O Goberno reclama á Xunta "buscar solucións e volver ao diálogo"
O delegado do Goberno, Pedro Blanco, reclamou á Xunta "buscar solucións e volver á senda do diálogo".
"A Xunta ten unha boa oportunidade para recapacitar sobre a Lei do Litoral, buscar solucións e volver á senda do diálogo", sostén Blanco nun audio remitido aos medios de comunicación.
Avanzou que "o Goberno vai seguir traballando na mesma liña, garantindo o futuro do sector mar-industria en Galicia" tras aprobar ata o de agora "55 concesións para estas empresas" que poden "continuar coa súa actividade".
"Porque co Goberno de Pedro Sánchez está garantida a seguridade xurídica e a actividade das empresas galegas, por iso espero e desexo que a Xunta reconsidere a súa postura e pense no ben común, no mellor para os galegos e as galegas", conclúe.