'Overbooking' na estación de Renfe na Coruña

De lamentable tachaban a situación os usuarios de Renfe que onte quedaron sen asento no tren das 13:58 con destino Vigo malia ter o billete na man. Medio cento de viaxeiros tiveron que ser recolocados noutro convoi, polo que non puideron chegar á hora prevista.

"Souben polas noticias que venderon o dobre de billetes, houbo 'overbooking'", conta unha rapaza.

Dende a Plataforma de Usuarios de Media Distancia insisten en que problemas coma os de onte suceden con frecuencia, e bótanlle a culpa ao sistema de venda de billetes en liña.

"Adoita fallar un pouco a aplicación, e si que é certo que sobre todo nos trens rexionais ás veces acostuman coller un pouco de atraso".

 "Pois problemas técnicos coa aplicación de Renfe e ás veces atrasos de ao mellor 10 minutos, ás veces 20 minutos, depende", coinciden dous usuarios de Renfe.

Este home leva un bo anaco pelexando co dispensador automático de billetes, que o obriga a mercar un tícket que non precisa.

"O problema que teño é que a máquina non me deixa coller dous adultos, un neno e outro neno menor de 4 anos, non mo permite, dime que teño que ir á ringleira, e aí está a ringleira, que é enorme", comenta o home.

 "Moitas veces non hai prazas nos trens, tes que collelo con moita antelación, os atrasos son terribles, ás veces pos reclamacións e non contestan nunca, mercas un billete e se se cancela por un erro do propio Renfe fas a reclamación e devólvenche só o 70 por cento, cando o erro é do propio Renfe. Vaia, fatal", apunta unha rapaza.

As queixas acumúlanse e os usuarios pídenlle a Renfe que actúe con decisións de alcance.