Dezaoito mortos e trece feridos nun tiroteo masivo nos Estados Unidos

Nova matanza nos Estados Unidos. Esta vez na pequena cidade de Lewiston, no estado de Maine, de apenas 39.000 habitantes. 

As imaxes captadas polas cámaras de seguridade e o coche que abandonou na zona sinalan a Robert Card, un instrutor de tiro de 40 anos, como o pistoleiro que atacou un bar e unha sala de birlos de Lewiston, en Maine, o máis setentrional dos estados da costa leste dos Estados Unidos.
Polo menos 18 persoas morreron nos tiroteos e trece quedaron feridas.

Card, que segundo a súa familia ten problemas mentais, continúa fuxido e está sendo buscado por un amplo dispositivo policial no que participan centos de axentes.

O fuxitivo vai armado e é perigoso, advirten as autoridades, que piden precaución á poboación."Se alguén o ve, non debe achegarse a Card nin establecer contacto de ningún xeito", dixo o comisionado de Seguridade Pública de Maine.

As clases foron suspendidas en todo o estado. As autoridades pediron aos comercios que permanezan pechados e á xente que se reclúa nas súas casas. "Vivo aquí desde que tiña 19 anos e estou sorprendida" di unha residente local ás portas do hospital onde ingresaron a maioría dos feridos.

Este é o tiroteo con maior número de mortos dos rexistrados este ano nos Estados Unidos.

Foi tal o número de feridos, oficialmente 50, que medios locais elevan ata 80, que os hospitais non daban abasto e algúns tiveron que ser trasladados a outros estados. 

A policía decretou situación activa e pediulles aos veciños que non saian das casas. Buscan o sospeitoso por terra e por aire. O feito de que actuase a cara descuberta fai pensar, máis ca nun acto terrorista, nunha misión de suicidio causando o maior dano posible. 

Robert Card foi diagnosticado de problemas mentais e tiña antecedentes por pornografía infantil. 
Esta é unha das maiores matanzas rexistradas nos EUA nos últimos anos.