26.000 persoas evacuadas das súas casas polo incendio de Tenerife
26.000 persoas evacuadas das súas casas polo incendio de Tenerife
As que non teñen onde pasar a noite foron realoxadas en pavillóns
O incendio deixa, de momento, 26.000 persoas desaloxadas de 11 municipios. As autoridades locais habilitaron pavillóns para acoller os evacuados que non teñen onde aloxarse. Alí reciben asistencia médica e psicolóxica.
A primeira hora da mañá houbo desaloxos en varios puntos de La Orotava, La Matanza ou Los Realejos. Durante a noite as condicións meteorolóxicas empeoraron a situación e obrigaron a evacuar con carácter preventivo os veciños de 11 municipios pola proximidade do lume ás vivendas.
En todos os municipios hai un punto de encontro de evacuados para derivalos a centros sociosanitarios, a un albergue ou a pavillóns en función das súas necesidades.
Os responsables dos servizos de emerxencia pídenlle calma á poboación e que sigan as indicacións que lles dan persoalmente ou a través de mensaxes telefónicas.
E o Goberno canario pediulles aos veciños das poboacións afectadas polo incendio que limpen a contorna das súas vivendas e que saquen as bombonas fóra das súas casas. Tamén lles recomenda precaución ás persoas que teñen enfermidades respiratorias ou cardíacas, porque a calidade do aire é desfavorable debido ao fume xerado polo incendio.
