A Audiencia Nacional arquiva definitivamente a causa pola ampliación de capital do Popular en 2012

A Sala do Penal da Audiencia Nacional (AN) arquiva de forma definitiva a causa en que se investigaban presuntas irregularidades cometidas na ampliación de capital do Banco Popular de 2012.

Nun auto, recollido por Europa Press, os maxistrados da Sección Segunda confirmaron o auto do mes de marzo pasado polo que o xuíz Santiago Pedraz denegaba a práctica de novas dilixencias e polo que acordaba o sobresemento provisional da investigación "ao non resultar debidamente xustificada a perpetración de delito algún".

A acusación de Cerquia Xestión, Cercupenta e o empresario Carlos Cercadillo entendía que o maxistrado debía practicar novas dilixencias que complementasen a pericial realizada polos inspectores do Banco de España que aseguraron que a decisión de realizar a ampliación de capital foi "un bo investimento con independencia da rendibilidade que obtivese cada un dos accionistas".

A Sala dá a razón ao maxistrado -que rexeitou esas novas pescudas- e descarta o argumento dos recorrentes, que consideraban que quedaran "dúbidas sen aclarar por parte dos peritos" e que serían "de vital importancia para poder acreditar" se se cometeu un delito.

O xuíz Pedraz deixaba claro no auto polo que decretaba o sobresemento que "non se deduce a existencia dunha manipulación da situación contable e económica do Banco Popular para propiciar unha imaxe errónea dos seus estados financeiros á que realmente tiñan, afirmacións efectuadas en varias ocasións polos peritos do Banco de España ante as preguntas das partes".