Un simulacro de alerta masiva de Axega este martes fará soar ao tempo 300.000 móbiles na Coruña
Un simulacro de alerta masiva de Axega este martes fará soar ao tempo 300.000 móbiles na Coruña
Todos os móbiles que estean na área da Coruña e Arteixo hoxe sobre as 10 da mañá van recibir un aviso sonoro a todo volume
Na mensaxe de texto xa se lles advirte que se trata dun simulacro: só deben pulsar ACEPTAR
A Axencia Galega de Emerxencias ensaiará por segunda vez o sistema de alerta masiva á poboación, nun aviso para a área metropolitana da Coruña. Chegará hoxe martes, sobre as 10 da mañá, a case 300.000 teléfonos móbiles.
Será un son a máximo volume. Na pantalla xa explican que só se trata dun simulacro, para probar este sistema de aviso. Fano cadrar co outro simulacro na factoría de Repsol. Simularase un fallo mecánico nunha cisterna de propano que provoca un incendio con varias persoas feridas e un accidente de tráfico na zona entre un vehículo e unha furgoneta con traballadores.
🚨 O sistema ES-Alert activarase na Coruña e Arteixo o vindeiro martes durante un simulacro de emerxencia
— Xunta de Galicia (@Xunta) October 10, 2024
📲 Quen se atope neses concellos a partir das 10,00h. recibirán unha mensaxe no móbil informando dun simulacro no polígono A Grela-Bens
ℹ️ https://t.co/3jDJHTUcFY pic.twitter.com/ALhZC3askI
O conselleiro de Presidencia, Xustiza e Deportes, Diego Calvo, participou na presentación do simulacro. Como novidade, explicou, aproveitarase o exercicio para realizar unha proba do sistema É-Alert, que ademais dos dous concellos afectados incluirá zonas limítrofes nos municipios de Oleiros, Culleredo, A Laracha e Carballo. Esta é unha ferramenta clave de Protección Civil para alertar á poboación de maneira masiva mediante o envío dunha mensaxe indiscriminada a todos os móbiles en caso de emerxencia.
O conselleiro da Presidencia, Xustiza e Deportes, Diego Calvo, participou na presentación do simulacro
Non hai que alarmarse nin chamar ao 112. Só hai que aceptar a mensaxe para que o son cese.
"Nunha oficina, nunha cafetería ou pola rúa van empeza a soar os móbiles. Este tipo de simulacros o que pretenden é a prevención", explicou o conselleiro da Presidencia, Diego Calvo.
Ao mesmo tempo, e como xa ocorreu noutros simulacros anteriores, activarase un sistema de sirenas que instaría a veciñanza da contorna máis próxima a adoptar determinadas medidas de autoprotección en caso de emerxencia real.
Un dos obxectivos do exercicio é probar e dar a coñecer á cidadanía o sistema É-Alert, que permite á Xunta enviar mensaxes instantáneas de alerta a través do 112 Galicia. Deste xeito, infórmase directamente a todas as persoas na área afectada por unha emerxencia.
Estas comunicacións inclúen instrucións sobre como actuar e, no caso do simulacro do día 15, a mensaxe sinalará que se trata unicamente dunha proba. Despois de lelo, as persoas que o reciban deberán presionar en 'Aceptar' sen realizar acción adicional algunha.
A mensaxe activará un asubío continuo e fará vibrar os teléfonos móbiles, mesmo se están en modo silencioso ou bloqueados. Este sistema está integrado na Rede de Alerta Nacional do Ministerio do Interior e só funciona con smartphones, que teñen que estar acesos e co 'modo avión' desactivado.
