A Axencia de Saúde Pública buscará protexer a poboación ante emerxencias sanitarias

O Consello de Ministros aprobou este martes o anteproxecto de lei polo que se crea a Axencia Estatal de Saúde Pública (Aesap) para protexer á poboación ante futuras pandemias e emerxencias sanitarias.

A ministra de Sanidade, Mónica García, non aclarou cal será a futura localización da axencia aínda que dixo que xa se abriu o procedemento para a súa designación, que depende do Ministerio de Política Territorial, e "hai candidaturas e entidades locais que se postulan" polo que se desenvolverá un proceso normal para situar a futura sede.

A titular de Sanidade explicou que a axencia é "unha débeda pendente" coa saúde pública, incorpora as leccións extraídas en pandemia e vén reforzar "a capacidade de anticipación e coordinación" ante crises sanitarias.

García informou de que a axencia ten cinco misións: a primeira, modernizar e cohesionar os sistemas de vixilancia, "os nosos radares", para responder ante futuras pandemias e a segunda incorporar o concepto OneHealth que subliña que "hai unha soa saúde que interpela á saúde humana, animal e ambiental".

"Para adaptarnos ás ameazas, esta lei vén poñer os fundamentos do que supón o cambio climático", dixo a ministra, que subliñou que as altas temperaturas son "malas noticias para a saúde" polo que a axencia reforzará a capacidade de avaliación e recomendación ante os riscos da emerxencia climática.

A cuarta misión pasa por mellorar a coordinación e a colaboración científica e académica coa industria e as administracións para monitorizar estratexias de resposta, e a quinta e última permitirá á axencia avaliar os determinantes sociais da saúde.

García lembrou que o proxecto para crear esta axencia leva esperando unha década, desde 2011 "cando o PP meteu nun caixón a lei de saúde pública", aínda que lembrou que a iniciativa se xestou na lexislatura anterior cando chegou, mesmo, a ter asignada ata unha partida orzamentaria.

Entón, o adianto electoral freou a iniciativa do mesmo xeito que algúns decretos fundamentais para desenvolver a Estratexia de Vixilancia en Saúde Pública do Sistema Nacional de Saúde.

O propósito é que a iniciativa pase ao Congreso dos Deputados para que se aprobe no primeiro trimestre do ano.