A Bolsa española volve caer por duodécimo día consecutivo

A Bolsa española perdeu o 1,02 % este xoves na súa duodécima sesión seguida á baixa e aproximouse a 7.800 puntos, afectada pola caída das prazas internacionais, segundo datos do mercado.

O índice de referencia en España, o IBEX 35, perdeu hoxe 80,1 puntos, o 1,02 %, ata 7.806 puntos. As perdas anuais elévanse ao 10,42 % e nestes doce días seguidos, na súa peor quenda de descensos da historia, acumula unha baixada do 8,3 %.

A caída desta xornada produciuse mentres retrocedían os mercados internacionais, empeoraba a actividade manufactureira en moitos países e o prezo do petróleo Brent baixaba a esta hora o 4 %, ata 92,65 dólares.

Dos grandes valores caeron Banco Santander, o 1,51 %, Inditex o 1,39 %, BBVA o 1,25 % e Repsol o 0,77 %. Iberdrola liderou as subidas do IBEX ao gañar o 1,16 % e Telefónica ocupou o cuarto posto cunha alza do 0,73 %. EFE