Tras o luns negro, as bolsas buscan recuperar terreo, con forte rebote das asiáticas

O principal índice da Bolsa de Toquio, o Nikkei, rebotou un 10,23 % este martes, a súa maior ganancia porcentual desde 2008 e a cuarta da historia, impulsada pola caza de gangas tras o esborralle do 12,4 % na véspera e pola recuperación do dólar fronte ao ien.

Desta forma, o Nikkei alcanzou o seu mellor resultado en porcentaxe desde o 30 de outubro de 2008, en plena crise financeira global, cando o selectivo avanzou un 9,96 %, e tamén a súa maior subida en puntos da historia, ao exceder os 2.676,55, tamén dese día.

O índice logrou así recortar perdas tras o trompazo histórico da véspera, que foi seguido por caídas xeneralizadas na maior parte das bolsas internacionais esporeadas tamén polo temor a unha posible recesión nos Estados Unidos.

O rebote foi xeneralizado nos principais mercados asiáticos e tamén as bolsas de Taipei e Seúl pecharon a xornada con subas superiores ao 3 %, que con todo non lles dá para recuperar nin a metade do perdido na xornada previa.

Os mercados europeos abren con tímidas subas

As bolsas europeas tamén comezaron a xornada en números positivos, aínda que lonxe de recuperar as perdas rexistradas na véspera. 

O Ibex 35 movíase tras iniciar o día cunha suba arredor do 0,4 %, logo de que o luns perdese máis do 2 %. 

En similares cifras estaban nos primeiros momentos da xornada os mercados de París (+0,3 %), Frankfurt (+0,8 %) ou Londres (+0,6 %), que tamén na véspera sufriran perdas importantes.

Os índices de futuros, tamén os dos mercados dos Estados Unidos, avanzan unha tregua para esta xornada, á espera de acontecementos.