A casa do pai de Fidel Castro en Láncara convértese nun museo da emigración
A casa do pai de Fidel Castro en Láncara convértese nun museo da emigración
Fidel Castro visitou a casa de seu pai en San Pedro de Armea en 1992
A familia Castro cedeu a vivenda á Asociación Amistad y Solidaridad Láncara-Cuba
O día da inauguración da Casa Láncara coincide co 30 aniversario da visita de Fidel Castro
Ángel Castro Argiz naceu nesta casa de San Pedro de Armea en 1875. Despois de loitar como soldado coas tropas españolas na guerra de Cuba, volveu á illa como emigrante, coma tantos outros galegos. Na nova república independente dedicouse a cortar cana e chegou a ter unha facenda azucreira na que naceron e se criaron os seus fillos Fidel e Raúl Castro.
Durante décadas, o fogar de orixe dos Castro en Armea foi unha das tantas casas abandonadas da Galicia rural. A visita do líder cubano en 1992 puxo o foco nesta construción tradicional da chaira luguesa que agora se transforma nun centro de interpretación da emigración galega a Cuba, conforme a cesión que fixeron os descendentes de Ángel Castro en 2018.
"Estou moi feliz de que se revivise o nome de meu pai"
A rehabilitación mantivo a estrutura orixinal da vivenda. Transformou as cortes e o pendello en espazo de exposición e actividades e remarcou o contexto da época co mobiliario da lareira. A inauguración coincide co 30 aniversario da visita de Fidel Castro a Láncara, pero de momento aínda non hai unha data concreta para a súa apertura definitiva ao público.
