A chuvia non impide que a veciñanza de Paradela represente a Resurrección
Un cento de veciños da parroquia de todas as idades dramatizan a Semana Santa máis realista de Galicia
Festa de Interese Turístico Galego, concentra centos de persoas no Domingo de Pascua
A chuvia non impediu este mediodía a representación da Resurrección de Xesús no adro da igrexa de Paradela, en Meis, na Semana Santa máis realista de Galicia, que este ano se viu obrigada a suspender varios dos seus actos.
É unha dramatización por parte dun cento de participantes que combina actos litúrxicos con escenificacións teatrais, que representan a Resurrección con realismo e emoción este domingo de Pascua.
A celebración, declarada de Interese Turístico de Galicia, congrega na parroquia centos de persoas chegadas de distintos lugares, tanto de Galicia coma doutras partes.
Trátase dunha representación interxeracional con figurantes desde os 3 ou 4 anos ata os máis de 80 dalgúns.
A teatralización deu paso despois aos actos litúrxicos cunha misa cantada pola Coral Polifónica Xunta de Meis e a posterior procesión de Resurrección coa Banda de Música A Vertula.
