A cifra de turistas en Terra Santa cae polo conflito entre Israel e Hamas

A comunidade cristiá en Xerusalén celebra unha Semana Santa marcada este ano polo conflito entre Israel e Hamas. A guerra deixa en mínimos as cifras de turismo nunha época que normalmente atrae milleiros de visitantes.

O número de peregrinos en Xerusalén aumentou lixeiramente despois de seis meses de conflito cunha cidade vella completamente baleira de turistas. Máis de dous millóns de turistas visitaron Israel no 2022 e, deles, un millón douscentos mil cristiáns chegaban normalmente a Terra Santa nestas datas, pero só nas previsións máis optimistas se prevé un 10 % neste 2024 nun sector económico devastado tamén pola retirada de permisos de traballo para os palestinos, que polo momento non poden traballar en Israel.

Aínda así, a maioría das tradicións cristiás mantéñense e mesmo aproveitaron a situación para reformar a igrexa do Santo Sepulcro, que acollerá as principais cerimonias relixiosas do seu calendario. Na cidade máis desexada do mundo coinciden o Ramadán e a Semana Santa católica, así como a Pascua xudía e a próxima Pascua ortodoxa. Un país en guerra e 3 relixións monoteístas coa esperanza de que o conflito remate e os reféns volvan á casa nas súas pregarias.