A CIG mobilízase nas Pontes para reivindicar "un plan industrial e emprego" na localidade

A CIG manifestouse este domingo nas Pontes de García Rodríguez (A Coruña) para reclamar "unha transición xusta" e un plan industrial xa que, aseguraron, o que ocorre nesta localidade e na súa contorna é "unha reconversión industrial" e que todos os anuncios dos gobernos son "propaganda".

Así o detallou o secretario xeral da CIG, Paulo Carril, nunha marcha que partiu ás 12:00 horas da praza do Carmen e que logrou congregar a unhas 200 persoas.

Os manifestantes berraron consignas como "Para nós os despedimentos, para Endesa os beneficios", "É demolición, non transición", "Queremos traballar, e non emigrar" e "As Pontes en loita, por un futuro digno".

Segundo Paulo Carril o obxectivo é reivindicar un "futuro industrial e emprego" nas Pontes, xa que ao seu entender "a transición xusta non existe". "Seguimos sufrindo as consecuencias dunha auténtica reconversión industrial pura e dura", lamentou.

"Endesa, con todo apoio dos gobernos, está a empezar o desmantelamento, deixando atrás despedimentos, á vez que está a actuar impunemente, sen asumir ningún tipo de responsabilidade social e territorial, ademais de continuar facendo caixa", criticou Paulo Carril.