O Tribunal da ONU esixe a Israel deter a ofensiva en Rafah e dar acceso a investigadores de xenocidio
O Tribunal da ONU esixe a Israel deter a ofensiva en Rafah e dar acceso a investigadores de xenocidio
O Tribunal da ONU esixe a Israel deter a ofensiva en Rafah e dar acceso a investigadores de xenocidio
A Corte Internacional de Xustiza volveu esixir que manteñan aberto Rafah para "a provisión sen obstáculos e a grande escala dos servizos básicos e a asistencia humanitaria"
Israel di que as acusacións de Suráfrica de xenocidio son "falsas e repugnantes"
O secretario xeral da ONU, Antonio Guterres, lembrou a Israel que as ordes son de obrigado cumprimento
![Protesta en contra do xenocidio a Palestina. Reuters.](https://img-g24-crtvg.flumotion.com/prog24/2024/20240524/Reuters-protesta-xenocidio-palestina-israel.jpg)
A Corte Internacional de Xustiza (CIX) esixiu este venres a Israel “deter inmediatamente” a súa ofensiva militar en Rafah, no extremo sur de Gaza. Ordenoulle tamén “garantir o acceso sen impedimentos” á Franxa de “calquera misión” que busque investigar as denuncias por xenocidio contra as autoridades israelís.
Nunha nova orde de medidas cautelares en protección dos dereitos dos palestinos, protexidos como grupo pola Convención sobre o Xenocidio, a CIX urxiu a Israel a “deter inmediatamente a súa ofensiva militar e calquera outra acción na gobernación de Rafah que poida impoñer ao grupo palestino en Gaza condicións de vida que poidan causar a súa destrución física total ou parcial”.
Ademais, ordenoulle “tomar medidas efectivas para asegurar o acceso sen impedimentos” a toda a Franxa de “calquera comisión de investigación, misión de determinación de feitos ou outro organismo investigador” baixo ordes dalgún dos órganos competentes da ONU “para investigar as denuncias de xenocidio”.
Así mesmo, esixiu ao Goberno israelí “manter aberto” o cruzamento de Rafah para “a provisión sen obstáculos e a grande escala dos servizos básicos e a asistencia humanitaria urxentemente necesarios” entre a poboación palestina de Gaza.
Estas medidas cautelares foron votadas por un panel de 15 xuíces e aprobadas con 13 votos a favor e dous en contra. A oposición foi do xuíz israelí Aharon Barak, nomeado 'ad hoc' por Israel para ter representación ante a CIX, así como da xuíza Julia Sebutinde, de Uganda, que xa votou en contra doutras decisións aprobadas por maioría neste tribunal no contexto da situación en Gaza.
Israel terá que presentar no prazo dun mes un informe con todas as medidas postas en marcha para cumprir coas ordes anunciadas hoxe polo tribunal.
Ademais destas novas medidas, a CIX advertiu a Israel de que debe tamén poñer en marcha as cautelares anunciadas en xaneiro e marzo, o que inclúe evitar que o seu exército cometa actos de xenocidio contra os palestinos de Gaza e deixar de “impedir” o acceso de axuda humanitaria á Franxa.
O tribunal accedeu a anunciar novas medidas cautelares contra Israel ao considerar que a situación actual derivada da súa operación militar en Rafah implica “un maior risco” de causar un “dano irreparable” aos dereitos dos palestinos como grupo protexido pola Convención. Polo que determinou que isto subliña unha “urxencia” e “un risco real e inminente” que obriga á CIX a intervir.
Esta é a cuarta vez que Suráfrica pide á CIX emitir medidas cautelares adicionais para evitar un xenocidio en Gaza e a terceira na que o tribunal emite esas medidas instando a Israel a respectar a Convención e a tomar pasos para evitar o exterminio dos palestinos de Gaza.
Israel insiste en que está a facer uso do seu "dereito para defender o seu territorio e aos cidadáns"
Tras coñecer o fallo da Corte Internacional de Xustiza (CIX) deste venres, o cal lle obriga a deter "de maneira inmediata" a súa ofensiva en Rafah, Israel tachou de "falsas e repugnantes" as acusacións de xenocidio por parte de Suráfrica.
"Israel non levou a cabo nin levará a cabo ningunha actividade militar na zona de Rafah que cre condicións de vida que poidan conducir á destrución da poboación civil palestina, total ou parcialmente", recolle un comunicado publicado polo Ministerio de Exteriores de Israel.
Na nota insístese en que Israel está a facer uso do seu "dereito para defender o seu territorio e aos cidadáns" tras os ataques de Hamas do pasado 7 de outubro e respectando o dereito internacional humanitario.
Ao redor dun millón de persoas fuxiron xa da cidade fronteiriza con Exipto, segundo os datos que proporcionou o xoves o Exército israelí, dos que 800.000 chegaron ás praias da o Mawasi, abarrotada doutros desprazados, e onde non hai auga potable nin luz.
Ese era o escenario que quería evitar parte da comunidade internacional, a cal estivo meses pedíndolle a Israel que non lanzase unha ofensiva terrestre nesta cidade sureña, convertida no último refuxio para os gazatís.
Pouco despois de coñecerse a decisión do tribunal da Haia, Israel intensificou os seus ataques en varios barrios da cidade de Rafah. Este venres os tanques seguiron avanzando cara ao centro da urbe.
Fronte a isto, o secretario xeral de Nacións Unidas, António Guterres, lembrou a Israel que as ordes da Corte Internacional de Xustiza son de obrigado cumprimento e que confía en que "as partes cumpran debidamente". Ademais, Guterres informou de que "transmitirá sen demora ao Consello de Seguridade a notificación das medidas cautelares".
Os países árabes celebran a orde e piden aplicala en todos os territorios palestinos
Xordania, Exipto e o Consello de Cooperación do Golfo (integrado por Barhein, Kuwait, Omán, Emiratos Árabes Unidos e Arabia Saudita) celebraron este venres a decisión "sen precedentes" da Corte Internacional de Xustiza (CIX), que esixe a Israel que deteña inmediatamente o seu ataque militar contra Rafah e piden estendela a todos os territorios palestinos ocupados.
O Ministerio de Exteriores de Arabia Saudita considerou esta decisión como "un paso positivo cara ao dereito moral e xurídico do pobo palestino", á vez que pediu estender estas resolucións internacionais a todos os territorios palestinos "para deter todas as formas de agresión" contra eles.
Pola súa parte, Xordania destacou nun comunicado que a decisión "representa la vontade internacional que pide el fin de esta guerra", a cal "superou todos os límites, as normas do dereito internacional e os valores humanitarios e morais". Mentres que Exipto esixiu a Israel "poñer en funcionamento todas as medidas" en Rafah e no resto da franxa.