A costa permanece en alerta laranxa tras o paso do temporal Bert

A Dirección Xeral de Emerxencias e Interior da Consellería de Presidencia, Xustiza e Deportes activou a alerta laranxa por temporal costeiro en todo o litoral galego. Segundo a Axencia Estatal de Meteoroloxía (Aemet), o fenómeno meteorolóxico adverso estará activo desde o mediodía, con mar combinado con ondas de ata 6 metros.

Por este motivo, a Administración autonómica, a través do Centro Integrado de Atención ás Emerxencias 112 Galicia, informou da situación os concellos das provincias afectadas; deputacións, servizos provinciais e agrupacións de voluntarios de Protección Civil e os clubs náuticos, entre outros.

As autoridades lembran a importancia de manterse afastado da liña de costa, incluídos os paseos marítimos. Tamén que se extremen as medidas de seguridade á hora de realizar calquera actividade no mar e que se revisen os cabos e amarres das embarcacións.

As 874 incidencias que deixou a borrasca Bert

A borrasca Bert deixou en Galicia durante as últimas horas un total de 874 incidencias, entre as que, segundo destacou o 112 Galicia, destacan árbores caídas, estradas afectadas e inundacións.

Así, a provincia máis afectada foi a da Coruña, con case 500 incidencias rexistradas estes días, seguida da de Pontevedra, con máis de 250. Pola súa banda, os concellos máis afectados foron os da Coruña e Vigo, con 76 e 63 avisos respectivamente, seguidos de Carballo (35), Santiago de Compostela (32) e Vilagarcía de Arousa (23).

En canto á tipoloxía, os sucesos máis reportados foron por árbores ou pólas en estradas, con case 300 avisos. Neste sentido, os equipos de emerxencia tiveron que intervir en 200 ocasións para previr riscos, mentres que se contabilizaron un total de 35 derrubamentos.

Entre as incidencias máis destacadas rexistradas durante a noite, o 112 Galicia destacou a caída dunha árbore que tirou uns cables que caeron sobre un vehículo en Cerdedo-Cotobade, aínda que sen causar danos persoais.

Así mesmo, tamén houbo numerosos avisos por inundacións. En Sada, un garaxe quedou asolagado pola auga, do mesmo xeito que nunha casa en Betanzos ao desbordarse un río preto da vivenda.