A dirección do PSdeG pacta coa local e o voceiro en Ourense desistir dunha moción de censura co PP
A dirección do PSdeG pacta coa local e o voceiro en Ourense desistir dunha moción de censura co PP
Apuntan a "centrar os esforzos" en presentar á cidadanía de Ourense "un proxecto ilusionante para un futuro que xa está ás portas"
Imaxe de arquivo de Formoso.
A dirección do PSdeG, co seu secretario xeral, Valentín González Formoso, á cabeza, pactou cos responsables locais e o portavoz no concello desistir dunha moción de censura co PPdeG na capital das Burgas contra o rexedor, Gonzalo Pérez Jácome.
Esta semana, tras as diferenzas nas actuacións do portavoz local e as mensaxes lanzadas pola dirección autonómica, producíronse senllas reunións na sede do Pino, que deu paso a resolver a posibilidade de promover unha moción de censura e negociar co PP local para desaloxar a Jácome do bastón de mando a menos dun ano das municipais.
"Centraremos os nosos esforzos en traballar para que en 2023 haxa unha maioría progresista que poida gobernar o Concello de Ourense co PSdeG-PSOE á cabeza", sinalan os socialistas nun comunicado tras o encontro deste martes coa responsable local, Natalia González.
De feito, este mesmo luns xa se lle trasladou ao portavoz municipal, Rafa Villarino, o rexeitamento para establecer estes contactos para unha moción de censura, o cal se ratifica este martes. No mesmo comunicado, o PSdeG reivindica o "compromiso" coa cidadanía de Ourense e "non pode admitir condicións ou pactos que limiten acordos entre forzas progresistas" para o futuro.
"Non levar a cabo unha moción de censura co PP"
Así, explican que os órganos directivos do PSOE decidiron "non levar a cabo unha moción de censura conxunta co PP" e "centrar os esforzos" en presentar á cidadanía de Ourense "un proxecto ilusionante para un futuro que xa está ás portas".
Finalmente, inciden en que "a responsabilidade do desgoberno" da cidade de Ourense é "só do seu alcalde" e de quen "o sustentou" durante tres anos e tres meses, en referencia aos populares, que chegaron a formar parte do Goberno local.
O presidente do PPdeG e da Xunta, Alfonso Rueda, apelara, aproveitando unha visita a Ourense este luns, a que os socialistas "se aclarasen" sobre a moción de censura, sobre a que dixo que o PP local tiña autonomía para decidir.
