A EMA alerta de danos graves e morte polo abuso de ibuprofeno e codeína

Os expertos da Axencia Europea de Medicamentos alertan do uso prolongado e en doses superiores ás recomendadas de fármacos que combinan codeína (opioide) e ibuprofeno, e agregaron os danos renais e gastrointestinais graves, incluída a morte, como posibles efectos secundarios.

O Comité de Avaliación de Riscos de Farmacovixilancia (PRAC) recomendou, na súa última reunión mensual, un cambio no prospecto dos medicamentos que combinan codeína e ibuprofeno para incluír unha advertencia de “danos graves, incluída a morte, especialmente cando se toman durante períodos prolongados en doses superiores ás recomendadas”.

“O comité revisou varios casos de toxicidade renal, gastrointestinal e metabólica que se informaron en asociación con casos de abuso e dependencia de codeína con combinacións de ibuprofeno, algúns dos cales foron fatais”, agrega a EMA.

Estes fármacos combinan un opioide (codeína) e un antiinflamatorio (ibuprofeno), e úsanse para tratar a dor, pero o PRAC sinala que o seu uso repetido pode provocar adicción e abuso debido ao compoñente de codeína.

O comité concluíu que, cando se toma en doses superiores ás recomendadas ou durante un tempo máis prolongado, a codeína con ibuprofeno pode danar os riles, evitando que eliminen de forma adecuada os ácidos do sangue aos ouriños.

O mal funcionamento dos riles tamén pode causar niveis moi baixos de potasio no sangue, o que en si pode provocar síntomas como debilidade muscular e mareos. Estes dous novos efectos adversos, coñecidos como acidose tubular renal e hipopotasemia, engádense a partir de agora ao prospecto dos fármacos que usan esta combinación, medicamentos que están usados a nivel nacional nos países da Unión Europea.

A EMA enviou estas recomendacións ás autoridades nacionais competentes, xunto a mensaxes chave para a comunicación correcta sobre este efecto secundario, e son eles quen decide sobre a necesidade de ofrecer información adicional a nivel nacional.