A familia do neno que faleceu no encoro de Mazaricos ve unha cadea de neglixencias

15 meses despois da morte dun escolar de Carballo afogado no encoro da Fervenza, en Mazaricos, durante unha excursión organizada polo colexio, a familia segue a loita xudicial por lograr que se faga xustiza.

Os feitos sucederon o 15 de xuño de 2021, cando un grupo de alumnos do colexio Fogar de Carballo participaban nunha excursión ao encoro. Acompañábanos 3 monitores dunha empresa de actividades de aventura e 2 profesores. Despois de realizar un percorrido en caiac, pediron permiso para bañarse.

Ao cabo duns minutos botaron en falta un dos rapaces e avisaron os servizos de emerxencias. Unha hora despois un bombeiro rescatou o seu cadáver do fondo do encoro. Desde entón a familia non cesou no intento de que se faga xustiza e se depuren responsabilidades pola morte do rapaz.

Cren que se debeu a unha cadea de neglixencias, como explica o seu avogado Estanislao de Kostka. Aseguran que o menor non sabia nadar, que a actividade non estaba programa nin autorizada polos pais e que aos nenos que se bañaron ordenáronlles quitar o chaleco salvavidas para non manchalos.

O caso está en fase de instrución no xulgado de Muros, onde declararon todas as partes, investigadores e testemuñas. Pero un informe pericial presentado polos acusados que insinúa que o neno puido morrer por causas naturais antes de afogar, indignou a familia. O seu avogado asegura que se trata dunha estratexia de defensa turbia e pouco ética.

Postos en contacto co colexio Fogar rexeitaron facer declaracións ao respecto do caso, para o que non hai aínda data de xuízo.