A Fiscalía pide que o Supremo investigue o eurodeputado Alvise por financiamento ilegal

A Fiscalía Anticorrupción solicitou a imputación do eurodeputado Luis Pérez, Alvise, no Tribunal Supremo por presunto financiamento ilegal en relación á suposta obtención de 100.000 euros dun empresario para a súa campaña electoral.

Fontes fiscais informaron a EFE de que o ministerio público pediu ao xuíz da Audiencia Nacional José Luis Calama que eleve exposición razoada ao Tribunal Supremo para investigar o líder de Se Acabó la Fiesta, ao ser este o órgano competente polo seu aforamento.

Neste contexto, a Audiencia Nacional dirixirase ao Parlamento Europeo para confirmar que Alvise é eurodeputado e, por tanto, aforado, antes de enviar ao Tribunal Supremo a causa en que se indaga o presunto cobro en metálico de 100.000 euros para o financiamento da formación.

Ese trámite, apuntan as citadas fontes, será o paso previo antes de que o titular do Xulgado Central de Instrución Número 4 remita ao alto tribunal a investigación sobre o pago que o empresario Álvaro Romillo, alias Cryptospain, efectuaría ao eurodeputado.

Esa investigación é en realidade unha peza separada dentro da causa en que o xuíz Calama investiga o propio Romillo pola presunta estafa piramidal que perpetraría Madeira Invest Club, unha trama da que Romillo sería máximo responsable.

O empresario asegurou o pasado mércores ante o xuíz que entregou 100.000 euros en metálico a Alvise Pérez para recibir favores futuros do dirixente e tamén beneficiarse da súa influencia na rede social Telegram.