O Supremo cita a declarar a Ábalos de forma voluntaria o 12 de decembro polo caso Koldo

O Tribunal Supremo citou a declarar de forma voluntaria como investigado o 12 de decembro ao exministro de Transportes José Luis Ábalos pola súa suposta participación na trama de comisións en contratos de máscaras durante a pandemia.

Ademais de citar a Ábalos, único imputado ata o de agora no Supremo, o maxistrado Leopoldo Puente acordou ampliar a causa e asumir a competencia para investigar ao seu exasesor Koldo García e ao considerado comisionista da trama, Víctor de Aldama, respecto a os feitos relacionados de forma "directa e inescindible" co exministro, polo que os cita tamén a declarar  o 16 de decembro ao primeiro e ao exasesor un día despois.

Condutas relacionadas

O xuíz Puente sinalou no seu auto que as condutas atribuídas a José Luis Ábalos no caso da adxudicación de contratos públicos de máscaras están "estreitamente vinculadas" coas de Víctor de Aldama e Koldo García, quen xa están a ser investigados pola Audiencia Nacional.

Neste contexto, será o Tribunal Supremo quen asuma a investigación sobre o papel de Ábalos nestes contratos e, con todo, o xuíz aclara que a Audiencia Nacional continuará coa investigación dos demais implicados, que son unha vintena, así como dos delitos adicionais relacionados con De Aldama e Koldo, como posibles delitos fiscais ou de branqueo de capitais.

En canto á relación entre Ábalos, De Aldama e García, o maxistrado explica que De Aldama foi quen presuntamente conseguiu as adxudicacións dos contratos de máscaras, utilizando a súa influencia sobre Koldo García e Ábalos, a través de pagos e contraprestacións económicas.

A investigación tamén apunta a pagos realizados por De Aldama tanto a Ábalos como a García, que estarían vinculados a estes contratos, incluíndo comisións de polo menos 400.000 euros a Ábalos e 250.000 a Koldo, parte das cales corresponderían á operación das máscaras.